Алматыда Денис Тенді еске алуға арналған халықаралық турнир өтеді
1-4 қазан аралығында Алматыдағы «Халық Арена» мұзайдынында мәнерлеп сырғанаудан Denis Ten Memorial Challenge 2025 VI халықаралық турнирі ұйымдастырылады. Жарыс 2025-2026 жылғы ISU Challenger Series маусымының жетінші кезеңі болып саналады.
Турнирге әлемнің 25-тен астам елінен шамамен 150 спортшы қатысады. Бағдарламада жеке сырғанау, мұздағы билер және жасөспірімдер арасындағы жарыстар бар. Жарыс нәтижелері ISU әлемдік рейтингінде ескеріліп, спортшыларға ұпай жинап, Олимпиадаға жолдама алу мүмкіндігін береді.
Денистің арманы
«Мен Қазақстанда елді әйгілі ететін жаңа спортшылар пайда болады деп сенемін», – деген еді Денис Тен.
Осы арманды жүзеге асыру мақсатында халықаралық турнир жыл сайын өткізіліп келеді. Ұйымдастыру комитетінің жетекшісі, Денистің анасы Оксана Тен:
«Бұл турнирдің басты мақсаты – Қазақстанда кәсіби мәнерлеп сырғанау спортын дамыту және осы тамаша спорт түрін насихаттау», – деп атап өтті.
Шоуға турнир жеңімпаздары мен қатысушыларымен бірге Қазақстан спортшылары – Михаил Шайдоров, Софья Самоделкина, Диас Жиренбаев қатысады. Арнайы қонақтар қатарында Олимпиаданың екі дүркін чемпиондары Татьяна Волосожар мен Максим Траньков бар.
Қазақстандық мәнерлеп сырғанаушылар Олимпиадаға квота алып, 2026 жылы Милан – Кортина-д’Ампеццода ел намысын қорғайды.
Турнир тарихы және ұйымдастырушылар
Denis Ten Memorial Challenge алғаш рет 2019 жылы өткізілді. Бүгінде ISU Challenger Series аясындағы беделді жарыстардың біріне айналды.
Биылғы турнирді ұйымдастырушы – «Денис Тен» қоғамдық қоры. Бас демеушісі – Sportqory спортты қолдау қоры. Жарыс Қазақстан Республикасының Туризм және спорт министрлігі мен Алматы әкімдігінің қолдауымен өтеді.
