Қазақстан Өзбекстанға бензин сатпайды – Энергетика министрлігі

Энергетика министрлігі Қазақстан Өзбекстанға бензин сатып отыр деген мәліметті жоққа шығарды. Бұл туралы Kursiv.Media министрлік мәлімдемесіне сүйене отырып хабарлайды.

«Қазір Қазақстаннан Өзбекстанға немесе өзге елдерге бензин экспорты жүзеге асырылмайды. Елде мұнай өнімдерін сыртқы шығаруға тыйым салынған. Үкімет заңсыз сауда мен контрабандамен күрес жоспарын іске асырып жатыр», – деп мәлімдеді министрлік.

Мекеменің мәліметінше, ақпарат құралдарының бірі биыл көктемдегі бір жолғы уақытша шара туралы жазған.

Үкімет маусым айынан бастап бензин экспортын толық тоқтатты.

Министрлік мұндай шара ішкі нарықты тұрақтандыруға, жанармай қорын айтарлықтай ұлғайтуға мүмкіндік бергенін атап өтеді.

«Жаздың басына қарай АИ-92 бензині қоры шамамен 70%-ға, дизель отыны қоры 78%-ға артты. Қазіргі таңда мұнай өнімдері нарығындағы жағдай тұрақты. Ішкі нарық толық көлемде қамтамасыз етіліп жатыр», – деп хабарлайды министрлік.

Бұған дейін Kursiv.Media жыл басынан бері Қазақстанда бензин 13%-ға қымбаттағанын жазған. Биыл жазда Қазақстанда автогаз бағасы 10%-ға көтерілгені мәлім болған.