ҚФФ ойыншылар тізімін жариялады, ал бапкер әлі белгісіз
Қазақстан футбол федерациясы (ҚФФ) ресми сайтында ұлттық және жастар құрамаларының қазан айындағы матчтарына арналған кеңейтілген ойыншылар тізімін жариялады.
Әлем чемпионаты-2026 іріктеу кезеңінде Қазақстан құрамасы 10 қазанда Астанада Лихтенштейнге, 13 қазанда Скопьеде Солтүстік Македонияға қарсы ойнайды. Бұл кездесулерде команданы кім басқаратындығы әзірге белгісіз. Бас бапкер Али Алиевтің қызметінен кеткені туралы ресми ақпарат жоқ. Дегенмен Бельгиямен (Брюссельде 0:6) өткен матчтан кейін ол отставкаға кеткенін мәлімдеді, ал ҚФФ атқару комитетінің мүшелері оның өтінішін қабылдағаны туралы деректер бар.
Құрамаға қабылданған ойыншылар:
Тізімге 38 ойыншы енді.
Қақпашылар: Мұхаммеджан Сейсен («Астана»), Стас Покатилов («Сабах», Әзербайжан), Бекхан Шайзада («Ордабасы»), Қажымұқан Төлепберген («Оқжетпес»);
Қорғаушылар: Әлібек Қасым («Ақтөбе»), Ян Вороговский («Астана»), Сергей Малый, Сұлтанбек Астанов, Сағадат Тұрсынбай (бәрі – «Ордабасы»), Нұралы Әліп («Зенит», Ресей), Әділбек Жұмаханов («Елімай»), Александр Зуев, Наурызбек Жагоров (екеуі де – «Тобыл»), Бағдат Қайыров («Ақтөбе»), Еркін Тапалов, Александр Мрынский (екеуі де – «Қайрат»).
Жартылай қорғаушылар: Рамазан Оразов, Алмас Төлібай, Ғалымжан Кенжебек (бәрі – «Елімай»), Муроджон Халматов, Эльхан Астанов (екеуі де – «Ордабасы»), Дамир Қасабулат («Қайрат»), Георгий Жуков («Ақтөбе»), Бактиер Зайнутдинов («Динамо Мәскеу», Ресей), Исламбек Қуат, Дінмұхамед Қараман (екеуі де – «Жеңіс»), Серікжан Мужиков, Дәурен Жұмат (екеуі де – «Оқжетпес»), Айбол Әбікен («Қайсар»), Ислам Чесноков («Тобыл»).
Шабуылшылар: Оралхан Өміртаев («Ақтөбе»), Максим Самородов («Ахмат», Ресей), Дастан Сатпаев («Қайрат»), Айбар Жақсылықов («Қайсар»), Алияр Мұхаммед («Оқжетпес»), Иван Свиридов («Елімай»), Рамазан Кәрімов («Астана»), Артур Шушеначев («Ақтөбе»).
Бапкер кім болады?
Жарияланған тізімде Алиевтің де, басқа бір маманның да аты жоқ. Сондықтан құрамаға кім жетекшілік ететіні түсініксіз. Оқу-жаттығу жиыны 1 қазанда Астанада басталады. Сол уақытқа дейін бапкер мәселесі шешіледі деген болжам бар.
Қазақстан құрамасы іріктеу турнирінің аяқталуына дейін-ақ 2026 жылғы Әлем чемпионатына шығу мүмкіндігін жоғалтты. Топта бірінші орын алған ғана әлемдік форумға тікелей жолдама алады. Екінші орын алған команда плей-оффта тағы бір мүмкіндікке ие болады.
Ал жастар құрамасында бапкер мәселесі толық анық. Бұрын белгілі футболшы болған 43 жастағы Денис Мамонов қазан айындағы матчтарға 24 ойыншы шақырды. Бұл негізінен бұған дейін 2027 жылғы жастар Еуропа чемпионатының іріктеу ойындарына қатысқан футболшылар.
Еуро-2027 (Албания мен Сербияда өтеді) финалдық кезеңіне әр топтың тоғыз жеңімпазы және екінші орын алғандардың ішінен үздік нәтиже көрсеткен бір команда (алтыншы орын иегерлеріне қарсы ойындар есепке алынбайды) тікелей жолдама алады. Қалған сегіз екінші орын иегерлері соңғы төрт жолдаманы плей-офф арқылы сарапқа салады.
9 қазанда қазақстандықтар сырт алаңда Андоррамен қайта ойнайды. Ал 12 және 14 қазанда Ташкентте Өзбекстан жастар құрамасына қарсы жолдастық кездесулер өткізеді.
