WSJ: АҚШ Украина Ресейге қарсы соққы жасауы үшін барлау мәліметтерін береді
АҚШ Украинаға Ресей аумағындағы энергетика нысандарына алыстан соққы жасауға мүмкіндік беретін барлау мәліметтерін беруге келісті. Бұл туралы The Wall Street Journal басылымы жазады.
Барлау деректерін неге береді
Америкалық шенеуніктердің айтуынша, жаңа келісім Украинаға мұнай өңдеу зауыттары, құбырлар, электр станциялары мен өзге де стратегиялық нысандарға дәл соққы жасауға мүмкіндік береді. Бұл шешім Ресейдің мұнайдан түсетін табысын қысқартуға бағытталған.
Reuters агенттігі атап өткендей, АҚШ Киевке барлау деректерімен бұрыннан беріп келеді. Алайда жаңа келісім Украинаға алыс қашықтықтағы соққыларды тиімді жүзеге асыруға жол ашпақ.
НАТО одақтастарына үндеу
WSJ дерегінше, АҚШ сондай-ақ НАТО елдеріне Украинаға осылай қолдау көрсету туралы өтініш жасаған. Бұл мәселе Вашингтонның Еуропа елдерімен бірлескен қадамдарын үйлестіру мақсатында көтеріліп отыр.
Сонымен қатар, АҚШ әкімшілігі Украинаға алыс қашықтықтағы Tomahawk ракеталарын беру мүмкіндігін де талқылаған. Вице-президент Джей Ди Вэнс бұл мәселенің қарастырылып жатқанын растады.
Қыркүйек айында Нью-Йоркте БҰҰ Бас ассамблеясы аясында өткен жабық кездесуде Украина президенті Владимир Зеленский Дональд Трамптан Tomahawk ракеталарын сұраған. Бұл ракеталар 2500 шақырымға дейін жетіп, Ресейдің іші стратегиялық нысандарға соққы жасауға мүмкіндік береді.
