Екінші нарықтан электромобиль немесе гибрид алу тиімді ме

Қазақстанда экологиялық таза көліктерге қызығушылық артып келеді. Бүгінде жолдарда бензинмен жүретін көліктермен қатар, гибридтер мен электромобильдер де жиі кездеседі. «Жасыл» көлікке деген сұраныс артқан сайын сатып алушылар жаңа үлгілерге ғана емес, екінші нарықтағы ұсыныстарға да назар аудара бастады.

OLX Қазақстан деректеріне сүйенсек, қазір сатылымда шамамен 419 хабарландыру бар. Оның ішінде ең көп үлеске Hyundai маркасы ие болып отыр, шамамен 240 көлік сатылымға шығарылған. Олардың көбі «өте жақсы» немесе «жақсы» күйде екені көрсетілген.

Kia да сұранысқа ие брендтердің қатарында – 140 ұсыныс бар, бірақ олардың жағдайы әртүрлі болып келеді: бір бөлігі жақсы болса, кейбірі жөндеуді қажет етеді. Қытайлық брендтердің үлесі әзірге аздау, алайда айтарлықтай қарқынмен өсіп келеді. Мәселен, Chery – 18, BYD – 17 көлік сатылымға қойылған. Ал сирек кездесетін маркалар қатарында Li мен Zeekr бар. Олар аз болғанымен, бұл нарықтың біртіндеп кеңейіп, әртараптанып келе жатқанын аңғартады.

Екінші нарықтағы бағалар да әртүрлі. Hyundai Santa FE шамамен 15 млн теңге тұрса, Kia Sorento орта есеппен 16 млн теңгеге бағаланады. Қытайлық Chery мен BYD-тың құны 8,4–8,6 млн теңге шамасында. Ал премиум сегменттегі Li мен Zeekr бағасы 20–25 млн теңгеге дейін жетіп, оларды элиталық ұсыныстар қатарына қосып отыр.

Көлік таңдауда жүріс қашықтығы да маңызды фактор саналады. Hyundai мен Kia көліктері көбіне 160–185 мың шақырым аралығында жүрілген күйде сатылады. Chery мен BYD болса, салыстырмалы түрде жаңа, жүрісі 50–70 мың шақырымнан аспайтын көліктер түрінде ұсынылған.

Екінші нарықтан электромобиль немесе гибрид алудың өзіндік артықшылықтары бар. Ең алдымен, олардың бағасы жаңа үлгілерге қарағанда әлдеқайда төмен. Автосалондағы қымбат көліктер уақыт өте арзандап, екінші нарықта тиімді ұсыныстарға айналады.

Екінші нарықтан электромобиль немесе гибрид алу тиімді ме?

Егер сенімді әрі күнделікті пайдалануға қолайлы көлік ізделсе, корейлік брендтерге назар аударған жөн. Ал егер заманауи технологиялар мен аз жүрісті жаңа көлік қызықтырса, қытайлық үлгілер тартымды болуы мүмкін, бірақ белгілі бір тәуекелдер бар. Имидж бен премиум жайлылықты жоғары қоятындар үшін Li мен Zeekr лайықты таңдау бола алады.

Қорытындылай айтқанда, Қазақстандағы электромобильдер мен гибридтердің екінші нарығы бүгінде сатып алушыға жеткілікті таңдау ұсына алады. Тәуекелді азайтудың ең басты жолы – көліктің батарея жағдайын, жүрісін және сервистік тарихын мұқият тексеру.