Самат Смақов Шерхан Қалмырзаны шамадан тыс мақтамауды сұрады

Талдықорғанның «Жетісу» командасының бас бапкері Самат Смақов «Қайраттың» жас қақпашысы Шерхан Қалмырза туралы пікір білдіріп, неге жас ойыншыларды артық назардан қорғау қажет екенін түсіндірді.

Аға ретінде онымен сөйлесуге тырысамын. Шынымды айтсам, оған баспасөзге сұхбат бермеуді, ешқандай бағдарламаға қатыспауды кеңес бердім. Ол әлі өте жас. Мысал ретінде айтайын: Еркебұлан Сейдахмет «Уфаға» ауысқанда оны қатты қысымға алды. «Еркебұлан дәретханаға барды», «кока-кола сатып алды» дегенге дейін жазылды. Соның бәрі талантты ойыншыны жоғалтуға әкелді, – деді Смақов.

Бапкердің пікірінше, ерте келген даңқ пен артық мақтау жас футболшылардың қалыптасуына кері әсер етуі мүмкін.

Қазір ең бастысы жігіттерге қысым жасамау, қайта қолдау көрсету. Олар әлі ештеңе ұтқан жоқ, сондықтан артық дәріптеудің қажеті жоқ. Бір сәтте бүтін бір буынды жоғалтып алуымыз мүмкін, – деп қосты ол.

Еске сала кетейік, «Қайраттың» 18 жастағы қақпашысы Шерхан Қалмырза биыл негізгі құрамда дебют жасап, Чемпиондар лигасының топтық кезеңінде мадридтік «Реалға» қарсы алаңға шыққан еді. Сондай-ақ Самат Смақовтың қызымен көңіл жарастырып жүргенін жазған едік.