BBC басшылығы Трамптың сөзіне қатысты жанжалдан кейін жұмыстан кетті
Британдық хабар тарату корпорациясының (BBC) бас директоры Тим Дэйви мен BBC News жаңалықтар бөлімінің жетекшісі Дебора Тернесс отставкаға кетті. Бұл шешім BBC Panorama бағдарламасында Дональд Трамптың сөзін өзгертуге байланысты туындаған даудан кейін қабылданды.
Тим Дэйви өз хатынада:
«BBC мінсіз емес. Біз әрқашан ашық, әділ және есеп беруге дайын болуымыз керек. Қазіргі BBC News төңірегіндегі пікірталастар менің шешіміме әсер етті. BBC жақсы жұмыс істеп келеді, бірақ кейбір қателіктер болды және бас директор ретінде мен түпкілікті жауапкершілікті өз мойныма алуым керек», – деді.
Дэйви отставка уақыты мен өкілеттілікті жаңа басшыға біртіндеп тапсыру тәртібін директорлар кеңесімен келісіп жатқанын айтты.
BBC News жетекшісі Дебора Тернесс те отставка туралы шешімін түсіндіріп, былай деді:
«Президент Трамп туралы Panorama бағдарламасы төңірегіндегі дау BBC-ге, мен ерекше құрмет тұтатын ұйымға зиян келтіретін деңгейге жетті. Иә, қателіктер болды, бірақ BBC News ұйым ретінде бейтараптықтан айныды деген айыптаулар жалған».
Дебора «Жауапкершілік менің мойнымда» деп айтып, сенбі күні отставка туралы өтінішін Тим Дэйвиге тапсырғанын хабарлады.
Тим Дэйви BBC-де 20 жыл еңбек еткен. 2020 жылы корпорацияның бас директоры болып тағайындалған, оған дейін жеті жыл бойы BBC Studios коммерциялық бөлімшесін басқарған. Дебора Тернесс BBC News жетекшісі қызметін 2022 жылдан бері атқарып келді. 5 мыңнан астам қызметкер жұмыс істейтін жаңалықтар бөлімін басқарып, әлемнің 40 тілінде хабар тарататын 500 млн көрерменге арналған контент өндірісін үйлестірген.
Трамптың реакциясы
АҚШ экс-президенті Дональд Трамп бұл жағдайға өз желісі TruthSocial арқылы пікір білдірді:
«Бәрі отставкаға кетіп жатыр немесе қызметінен босатылып жатыр, өйткені менің 6 қаңтардағы сөзімді бұрмалағандары әшкереленді», – деп жазды Трамп.
Трамп сондай-ақ BBC қызметкерлерін «адал емес адамдар» деп атап, оларды АҚШ-тағы президенттік сайлауға араласуға тырысты деп айыптады:
«Олар демократияға нұқсан келтірді. Бұдан да жаманы бұл біздің басты одақтас деп саналатын елдің ұйымы!», – деді АҚШ президенті.
Жанжалдың мәні
Даудың басталуына Telegraph басылымы жариялаған материал себеп болды. Онда BBC Panorama-ның өткен жылы эфирге шыққан «Трамп: Екінші мүмкіндік пе?» атты деректі фильмі көрермендерді шатастырды делінген. Басылымның мәліметінше, бағдарламада Трамптың 2021 жылғы 6 қаңтарда Капитолийдегі тәртіпсіздіктер күні сөйлеген сөзінің екі бөлігі біріктіріліп, бүліктерді қолдағандай әсер қалдырған.
Telegraph бұл ақпаратты BBC ішкі қызметтік жазбасына сүйеніп жазған. Жазбаны корпорацияның редакциялық стандарттар комитетінің бұрынғы тәуелсіз кеңесшісі Майкл Прескотт дайындаған.
