«Нарықтар тынысын тартып тұр»: алтын өсті, биткоин құлады, теңге бағыт іздеуде

Апта басынан бері S&P 500 индексіне арналған фьючерстер 0,57%-ға өсіп, 6734 пунктке көтерілді. Апта қорытындысы – оң. Бенчмарк қатарынан екі күн құлдырап отыр. Бұл құбылыс бір қарағанда күтпеген жайт: шатдаун аяқталды. АҚШ экономикасында кейінге шегерілген сұраныс есебінен жеделдеу белгілері бар, ал нарық қатысушылары бұған дейін өсуге бейім еді. Бірақ нарықтағы басты фактор – анық көрінбейтін болашақ, яғни статистиканың жоқтығы.

Статистика төңірегіндегі белгісіздік

Өкілдер палатасы уақытша бюджет туралы заң жобасын қабылдағаннан кейін, нарық қатысушылары деректер толқыны басталады деп күтті. Қыркүйек пен қазан айларына қатысты инфляция мен еңбек нарығы жөніндегі есептер бірінен соң бірі жариялануы керек болатын.

Логика қарапайым еді:

• шатдаун әсерінен статистика «салқындау» көрсетеді;
• ФРЖ желтоқсанда мөлшерлемені төмендетуге мәжбүр болады;
• сұраныс артып, S&P 500 жыл соңына қарай 7000 пункттен жоғары көтерілуі ықтимал.

Нарық осы сценарийді алдын ала бағалап, индекс 6850 пункттік маңызды қарсылықтан жоғары көтерілді. Егер осы деңгейде тұрақтай алса, ралли басталуы әбден мүмкін еді.

Алайда бейсенбі күні күтпеген ақпарат шықты. Ақ үйдің экономикалық кеңесшісі Кевин Хассет:

• қыркүйек айындағы еңбек нарығының толық есебі тек келесі аптада шығады,
• қазан айындағы есеп қысқартылған түрде жарияланып, тіпті жұмыссыздық деңгейі көрсетілмейтінін мәлімдеді.

Себебі қазан айында үй шаруашылықтары арасында сауалнама жүргізілмеген.

Нарық тұманда қалды

Нарық қатысушылары не істеу керегін білмей қалды: қазір сатып алу керек пе, әлде деректерді күткен дұрыс па?

Көпшілік күту тактикасын таңдады.

S&P 500 фьючерстері бірнеше күн бойы сырғып, дүйсенбіде пайда болған 6740 деңгейіндегі баға алшақтығын жапты да, сол жерде тоқтады. Ал әрі қарай төмендеу қауіпті: индекс 6700-тен төмен түссе, 6500-ге дейін түзету жылдамдауы ықтимал. Ол жақта да жабылмаған гэп бар.

Сонымен бірге, нарық қатысушылары ұзақ мерзімді перспективада бенчмарктың жыл соңына дейін өсуі ықтималдығын жоғары деп санайды. Сол себепті қазіргі баға төмендеуі кейбір инвесторлар үшін жинақтауға қолайлы деңгей бола бастады.

2019 жылғы сценарий қайталануы мүмкін бе?

2019 жылы дәл осындай жағдай болған. Шатдаун аяқталғаннан кейінгі бірінші күні S&P 500 фьючерстері 1,50%-ға құлаған, бірақ кейінгі екі күнде толықтай қалпына келіп, тіпті үш ай ішінде 12% ралли көрсеткен.

Инвесторлар тарихты жақсы біледі әрі мүмкіндікті жіберіп алғысы келмейді.

Инвесторлар позициясы қандай?

Үлкен ойыншылар аздап фиксация жасады.
Апта ішінде SPY ETF-тен 3,59 млрд доллар капитал шықты. Бұл – орташа көрсеткіш.

Апта бұрын байқалған 12 млрд доллар көлеміндегі рекордтық сатып алудан кейін, бұл шағын түзету ғана. Негізінен, ірі инвесторлардың позициясы әлі де бұқа нарық, яғни өсуге бағытталған.

Қытай: Нарықтағы аралас динамика

Hang Seng индексі +0,84% өссе, Shanghai композиті -0,10% төмендеді.
Инвесторлар Қытай экономикасының баяулауы мен риэлторлық сектордағы проблемалардың әлі шешілмеуін ескеріп, абай қадам жасауда.

Дегенмен Гонконг нарығындағы аздаған өсім технологиялық сектордағы ірі компаниялардың қалпына келе бастағанын көрсетеді.

Ресей: Төмендеу жалғасуда

Мосбиржа 2 525,68 (-0,76%) көрсеткішіне түсті.
Негізгі қысым факторлары:

• мұнайдың құбылмалылығы;
• санкциялық шектеулер;
• рубльдің тұрақсыздығы.

Инвесторлар үшін Ресей активтері әлі де тәуекелі жоғары аймақ саналады.

Ұлыбритания: FTSE 100 әлсіз динамикада

FTSE 100 индексі 9 698,37 (-0,38%).
Негізгі тежеуші факторлар — инфляцияның баяу төмендеуі және өндірістік сектордағы әлсіздік.
Британия экономикасы рецессия шегінде тұрғандықтан, нарық өсу драйверін таба алмай отыр.

Қазақстан: KASE-де төмендеу

KASE индексі 6 948,17 (-0,11%) деңгейінде.
Жергілікті нарыққа қысым түсіруде:

• сыртқы нарықтағы белгісіздік,
• мұнай бағасының шектеулі өсімі (+1,02%),
• инвесторлардың тәуекелден қашуы.

Сонымен қатар акциялар бойынша апталық динамика да аралас — банктердің кейбірі өссе, телеком және энергетика секторында төмендеу байқалады.

Теріс аймақта жабылған эмитенттер

Апта бойы бірнеше ірі компания акциялары төмендеу көрсетіп отыр:

• CCBN (Банк ЦентрКредит) –1,19%
• KCEL (Kcell)  –1,10%.
• KZTK (Қазақтелеком)  –2,22%
• KSPI (Kaspi.kz Group)  –0,50%.
• KEGC (KEGOC)  –0,98%
  
  

 Өсім көрсеткен эмитенттер

Бірқатар компания акциялары аптаны оң аймақпен жапты:

• FRHC (Freedom Holding Corp.)  +5,42%
• KZAP (Қазатомпром)  +1,42%.
• KMGZ (ҚазМұнайГаз)  +1,54%
• AIRA (Air Astana)  +0,93%
• KZTO (ҚазТрансОйл)  +0,13%
• HSBK (Halyk Bank)  +0,11%.

Мұнай: жеңіл өсім, бірақ тұрақсыз нарық

Brent — 64,24 доллар (+1,02%)

Мұнай бағасы апта ішінде біршама көтерілді. Бұл өсімге әсер еткен факторлар:

• АҚШ-тағы шатдаунның аяқталуы, сұраныстың қалпына келуіне деген үміт;
• Қорлардың азаюы жөніндегі сигналдар;
• ОПЕК+ өндірістік квоталарды сақтап қалуы.

Дегенмен, нарықтағы белгісіздік жоғары. Инвесторлар әлемдік экономиканың баяулауы мен Қытай сұранысының әлсіздігіне байланысты ұзақ мерзімді оптимизмге асықпай отыр.

Қысқа қорытынды: Мұнайда жоғарыға қарай қозғалыс бар, бірақ тұрақты тренд қалыптасқан жоқ.

Алтын: қауіпсіз активке сұраныс күшейді

Алтын — 4 102,4 доллар (+2,64%)

Алтын апта фавориттерінің бірі болды. Инвесторлар статистика тапшылығының және геосаяси тәуекелдердің фонында қауіпсіз активтерге бет бұрды.

Негізгі факторлар:

• АҚШ деректерінің кешігуінен туындаған белгісіздік фазасы;
• ФРЖ желтоқсанда мөлшерлемені төмендетуі мүмкін деген күтілімнің күшеюі;
• Доллар индексінің аптаның ортасында әлсіреуі.

Алтын бағасы жоғары деңгейде бекінсе, жыл соңына қарай жаңа тарихи рекордтарға ұмтылуы мүмкін.