Блогерді Тимати туралы пост үшін полицияға шақырды: Балаева жағдайға пікір білдірді

Мәдениет және ақпарат министрі Аида Балаева Тиматидің концертіне бойкот жариялағаны үшін полиция бөлімшесіне шақырылған блогер Аида Жексенова жайлы пікір білдірді.

Сенат кулуарында журналист министрден «әртіске бойкот жариялау заң бұзушылық па, әлде бұл азаматтық ұстаным ба?» деп сұрады. Министр бұл әрекеттен ешқандай қылмыстық құрам көрмейтінін айтты.

«Ол әрқашан жеке пікірін ашық айтады. Кейде билікті де сынайды. Бұл – конструктивті сын, қалыпты жағдай. Жалпы өз ойын ашық білдіретін блогердің барлығын дерлік бақылап отырамын. Оның жүкті екенін де білемін. Ұлттық комиссияның төрайымы ретінде мен оны әйел ретінде қолдадым. Біздің министрлік те бұл жағдайды зерттеп жатыр. Менің ойымша, оны шақырту – тек рәсімдік қадам болды, себебі нақты арыз түскен», – деп жауап берді Балаева.

Айта кетейік, бұған дейін блогер Аида Жексенова желіде өзін Астана полициясы департаментінің экстремизмге қарсы күрес бөлімшесіне шақырғанын хабарлаған. Ал полицияға Қазақстанда ресейлік жұлдыздардың концертін ұйымдастырушы Алексей Пучков арыз түсірген.

Жексенова Тиматидің Қазақстандағы концертіне бойкот жариялауға шақырған жазбасы үшін оған Қылмыстық кодекстің 174-бабы («әлеуметтік, ұлттық, рулық, нәсілдік, сословиялық немесе діни алауыздық қоздыру») бойынша қылмыстық жауапкершілік төнуі мүмкін екенін айтқан еді.