2025 жылғы жәрдемақы: Кімге, қанша және қалай төленеді?
2025 жылдың басынан бері Қазақстанда көпбалалы отбасылар мен наградталған аналарға арналған мемлекеттік жәрдемақылар жалпы 846,5 мыңнан астам отбасыны қамтып, оларға 501,8 млрд теңгеден аса қаржы төленді. Бұл туралы Еңбек және халықты әлеуметтік қорғау министрлігі хабарлады.
Министрліктің дерегінше, көпбалалы отбасыларға арналған жәрдемақымен 603 мың отбасы қамтылып, оларға 436,5 млрд теңге төленген. Ал наградталған аналарға (Алтын алқа, Күміс алқа, Батыр ана және «Ана даңқы» ордендерінің иегерлері) 243,4 мың адам ие болған. Бұл санатқа жалпы 65,2 млрд теңге бағытталған.
Кімдер жәрдемақы ала алады?
Көпбалалы отбасыларға берілетін жәрдемақыға 4 және одан да көп кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар үміткер бола алады. Айта кету керек, олардың табысы назарға алынбайды.
2025 жылғы төлем мөлшері:
- 4 бала — 63 030 теңге
- 5 бала — 78 798 теңге
- 6 бала — 94 565 теңге
- 7 бала — 110 332 теңге
- 8 және одан көп бала — әр балаға 15 728 теңге
Наградталған аналарға төленетін жәрдемақы:
- «Күміс алқа» иегерлері — 25 165 теңге
- «Алтын алқа», «Батыр ана», «Ана даңқы» І–ІІ дәрежесі иегерлері — 29 097 теңге
Министрлік 2025 жылдың 1 қаңтарынан бастап балалы отбасыларға арналған мемлекеттік жәрдемақылардың мөлшері 6,5%-ға артқанын атап өтті.
Еске салсақ, бұл төлемдер әлеуметтік тұрғыдан әлсіз топтарды қолдауға бағытталған, ал жәрдемақы мөлшерін индексациялау жыл басындағы инфляция деңгейіне сәйкес жүргізіледі.
Үкімет келер жылы да әлеуметтік төлемдерді толық орындауға уәде берді. Жәрдемақылар төлеу үшін келесі жылы бюджеттен 10,7 трлн теңге бөлінеді. Оның ішінде 6,8 трлн теңге әлеуметтік төлемдерге, яғни зейнетақы, жәрдемақы мен басқа да әлеуметтік қолдау түрлеріне бағытталса, 3,9 трлн теңге адами капиталды дамытуға жұмсалады.
