Қандай кәсіпкерлер арнаулы салық режимімен жұмыс істей алады

Үкімет өзін-өзі жұмыспен қамтығандарға арналған жаңа арнайы салық режимін қолдануға болатын қызмет түрлерінің тізімін бекітті.

Жарияланған Үкімет қаулысында тізім көрсетілген. Қаулы 2026 жылдың 1 қаңтарынан бастап қолданысқа енгізіледі. Тиісті қаулыға премьер-министр Олжас Бектенов қол қойған.

Рұқсат етілген тізімге 40 қызмет түрі кірді:

мал шаруашылығын дамытуға жәрдемдесу қызметі;
музыкалық аспаптар өндіру;
сылақ жұмыстары;
ағаш шеберлігі және балташылық жұмыстары;
еден төсеу және қабырғаларды қаптау;
сырлау және әйнек орнату жұмыстары;
желілік маркетинг арқылы бөлшек сауда;
такси қызметі;
басқа да пошта және курьерлік қызмет (басқа пошта қызметін қоспағанда);
дайын тағамды тапсырыспен жеткізу;
тұрғын үйді жалға беру (субаренда) және өз меншігіндегі немесе жалға алынған тұрғын жылжымайтын мүлікті басқару;
фото түсіру саласындағы қызмет;
ауызша және жазбаша аударма қызметі;
ветеринарлық қызмет;
жеке тұтынуға арналған және тұрмыстық өзге де заттарды жалға беру және лизинг;
тұрғын үйлерді жалпы тазалау;
басқа топтауларға кірмейтін көмекші коммерциялық қызмет көрсету (тек интернет-платформалар арқылы көрсетілетін қызметтер бойынша);
спорт және демалыс саласындағы білім беру;
мәдениет саласындағы білім беру;
басқа топтауларға кірмейтін білім беру қызметі;
көркемдік және әдеби шығармашылық;
компьютерлер мен перифериялық жабдықтарды жөндеу;
байланыс жабдықтарын жөндеу;
электронды тұрмыстық техниканы жөндеу;
тұрмыстық аспаптар, үй және баққа арналған жабдықтарды жөндеу;
аяқ киім жөндеу;
табиғи және жасанды былғарыдан жасалған жол сөмкелері мен галантерея бұйымдарын жөндеу;
жиһаз және интерьер заттарын жөндеу;
қол сағаттары және басқа да сағат түрлерін жөндеу;
зергерлік бұйымдарды жөндеу;
тоқыма және трикотаж бұйымдарын жөндеу;
тігін бұйымдарын, бас киімдерді және тоқыма галантерея бұйымдарын жөндеу;
былғары, аң терісі бұйымдары мен бас киімдерді жөндеу;
музыкалық аспаптарды жөндеу;
кілемдер мен кілем бұйымдарын жөндеу;
велосипедтер жөндеу;
басқа топтауларға кірмейтін жеке тұтыну және тұрмыстық заттарды жөндеу;
шаштараздар мен сұлулық салондары қызметі;
үй шаруашылықтарының үй қызметкерлерін жалдауы;
үй шаруашылықтарының жеке тұтыну үшін тауар өндіру қызметі.

Айта кетейік, бұған дейін Ұлттық экономика министрлігі арнайы салық режимін қолданушылар тізімін талқылауға шығарды. 1111 кәсіп түрінің 795-і салық жеңілдігін пайдалана алмайтынын жазған едік.