Түркістан облысында бағаны негізсіз көтерген дүкендерге айыппұл салынды
2025 жылы Түркістан облысында бағаны негізсіз көтеріп жіберген 62 дүкенге айыппұл салынды. Бұл туралы Kursiv.Media өңір әкімдігінің мәліметіне сүйене отырып хабарлады.
Жыл басынан бері Түркістанда өңірлік комиссияның 44 отырысы өтті. Соның нәтижесінде 62 дүкенге әкімшілік шара қабылданып, оларға айыппұл салынды.
28 қарашада әкім орынбасары Нұрбол Тұрашбеков өткізген жиналыста сауда басқармасының басшысы Нұржігіт Мырзахметов әлеуметтік маңызы бар азық-түлік тауарларының бағасын тұрақтандыру бағытында атқарылған жұмыстар туралы баяндады.
Жиналыста Түркістан-Шымкент-Сарыағаш бағытындағы күре жол бойында орналасқан кәсіпкерлік нысандардың қасбетін реттеу мәселесі де қаралды. Басқарма басшысының мәліметіне сәйкес, жол бойында 149 кәсіпкерлік нысан бар. Оның 85-і жөндеуді қажет етеді.
Әкімдік бағаны тұрақты ұстап тұру үшін ауыл шаруашылығы тауарлары жәрмеңкесін үнемі ұйымдастырып отырмақ.
Бұған дейін Kursiv.Media 29-30 қарашада бес өңір Астанадағы Соғым-FEST жәрмеңкесінде арзан ет сататынын жазған. Оған Түркістан облысының шаруалары да қатысады.
