Украина президенті кеңсесінің бұрынғы басшысы Ермак майданға аттанады

28 қарашада Украина президенті кеңсесінің басшысы қызметінен алынған Андрей Ермак майданға аттанады. Саясаткер New York Post басылымына осылай деп мәлімдеді.

«Мен майданға барғалы жатырмын. Кез келген қудалауға дайынмын. Өзімді адал, әдепті адам деп есептеймін», – деді Ермак.

Бұрынғы шенеунік Ресейге қарсы соғысқа нақты қашан аттанатыны туралы ештеңе айтпады.

«Менің атыма кір келтірді. 2022 жылғы 24 ақпаннан бері Киевте жұмыс істегеніме қарамастан, ар-ұжданым қорғалмады. Зеленскийге (украин президенті Владимир Зеленский – ред.) кесірім тимегенін қалаймын – майданға барам», – деп мәлімдеді ол

Ермак жұма күні энергетика саласындағы жемқорлыққа қатысты дауға байланысты қызметтен алынды. Кеше таңертең оның кеңсесі тінтілді.

Оның алдында украин жемқорлықпен күрес қызметі «Мидас операциясы» деп аталып кеткен қылмысты 15 ай бойы тергеген. Құзырлы орган «Энергоатом» мердігерлерін 10-15 пайыз пара беруге міндеттегенін анықтаған. Талапты орындамағандар қара тізімге кіріп кеткен.