Алматы облысы әкімінің орынбасары Есболатов жаңсақ сөйлегені үшін кешірім сұрады
Әлеуметтік желілерде Алматы облысы әкімінің бірінші орынбасары Қанат Есболатовтың министр қатысқан жиында сөйлеген видеосы тарап жатыр. Жаңа қызметке жақында ғана кіріскен шенеунік мүмкіндігі шектеулі жандарды Құдай «жазалады» деп, сынның астында қалды.
Шенеунік жаңсақ сөйледі
28 қарашада денсаулық сақтау министрі Ақмарал Әлназарованың Алматы облысы тұрғындарымен ресми кездесуінде Қанат Есболатов қатты жаңылысып, көпшілік көңіліне тиетін сөздер айтты.
«Мүгедектердің еңсесін түсірмейік. Алла тағала бұл кісілерді, орысша айтқанда, «наказали» ғой. Сыйлайық», – деді өңір әкімінің орынбасары.
Саясаткер сөзін Талғардағы үлкен залға жиналған жүз шақты адам естіді. Арасында мүмкіндігі шектеулі азаматтар мен олардың туыстары да бар.
Видео әлеуметтік желілерде тез таралып кетті. Көпшілік биліктен Есболатовқа сөгіс жариялауды, ал әкім орынбасарынан халықтан кешірім сұрауды талап етті. Олардың арасында қоғам қайраткері Алмаз Ержан да бар.
«Мұндай адамдар мемлекеттік қызметте болмауы, одан қалды ірі лауазымды атқармауы тиіс», – деп жазды ол Facebook-тегі парағына.
Оның пікірінше, шенеунік көпшіліктің, БАҚ өкілдерінің алдында мүмкіндігі шектеулі 750 мың сайлаушының ар-ұжданына тиді.
Кешірім сұрады
Сынға ұшыраған Есболатов бір тәуліктен кейін ғана желіні шулатқан «видеоға қатысты ақпарат беруді» жөн деп шешкен.
«Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. «Құдай үлкен сынақ берген» деп айтпақ болғанмын», – деп ақталды шенеунік Facebook-тегі жазбасында.
Әкімдік өкілі қателігін мойындап, халықтан кешірім сұрады.
«Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын».
Қанат Есболатов Алматы облысы әкімінің бірінші орынбасары лауазымына 2025 жылғы 3 қарашада тағайындалған. Оның алдында Көкжазық ауылының, Кербұлақ ауданының әкімі қызметтерін атқарған.
