Жидебайдағы құсбегілер турниріне жүз шақты жыртқыш құс қатысты (фото)

Абай облысында кемеңгер ақынның туған жері – Жидебай қорығында республикалық құсбегілер турнирі өтті. «Абай салбурыны – 2025» жарысына жүз шақты жыртқыш құс қатысты. Ұлттық құндылықтарды ұлықтап, салт-дәстүрді дәріптеуге арналған шара туралы мәлімет пен суреттерді облыс әкімдігінің баспасөз қызметі таратты.

Бүркітшілер бәсекесіне биыл елдің тоғыз облысы мен үш қаласынан 70-ке жуық бүркіт, 14 ителгі мен 15 қаршыға өнер көрсетті. Жарыс «TauKum» этно ауыл кешенінде ұйымдастырылды.

Бүркітшілер сайысында астаналық Ерасыл Серікбек «Қарашолақ» атты құсымен бірінші орынды иеленді. Жеңімпаз жүлдесі – 600 мың теңге .

Ителгі жарысында Бабажан Бақдаулет «Қаракөз» атты құсымен жеңіске жетті. Оған 500 мың теңге жүлде тапсырылды.

Қаршыға бәсекесінде Жамбыл облысынан келген Берікболсын Бабажан жеңімпаз атанды. Оған да 500 мың теңге тапсырылды. Ал құстың аты – «Қанжар».

Құсбегілер сайысында қаршығаны қолына қондырған ару үшінші орын алған айта кеткен жөн.

Екі күнге созылған тартысты турнир аясында құмай тазы жарысы да болды. Додада Үржар ауданының қатысушысы Рахат Ақылжанов топ жарды.

Cайыс жеңімпаздарын облыс әкімі, республикалық құсбегілік федерациясының президенті Берік Уәли марапаттады.

«Құсбегілікке қызығушы жас буынның қатары артып, осы саладағы тәжірибелі мамандар саны көбейіп келеді. Бұл халқымыздың рухани мұрасының болашаққа берік негізделіп, сенімді түрде жалғасын тауып келе жатқанын көрсетеді», – деді облыс әкімі.

Дәстүрлі әнші, жыршы, Қазақстанның еңбек сіңірген қайраткері Айгүл Елшібаева мен ҚР мәдениет қайраткері Өмірқұл Айниязов өнер көрсетіп, әннен шашу шашты.