Қазақ мұнайы ағатын құбырға дрондар шабуылдап, үкімет балама бағыт іздеп жатыр

Қазақстан энергетика министрлігі Каспий құбыр консорциумының (КҚК) теңіздегі терминалына жасалған шабуылды сынады. Кешен істен шығып қалған соң, үкімет шұғыл түрде мұнай экспорттайтын балама бағыт іздеуге көшті.

Қазақстан мүддесіне зиян келтіреді

29 қарашада Энергетика министрлігі Новороссийск портындағы төтенше жағдайға байланысты мәлімдеме таратты.

«Азаматтық маңызы бар инфрақұрылым нысандарына бағытталған мұндай әрекеттерге жол берілмеуі тиіс», – делінген мәлімдемеде.

Министрлік халықаралық энергетикалық жоба нысандарына күш қолдану жаһандық энергетикалық қауіпсіздікке тікелей қауіп төндіреді деп есептейді. Мұндай әрекет консорциумға қатысушыларға, соның ішінде «Қазақстанның экономикалық мүдделеріне елеулі зиян келтіреді«.

Мұнай айдайтын балама бағыттар

Қазақстанда өндірілетін мұнайдың шамамен 80%-ы КҚК арқылы Батысқа экспортталады. Сол себепті үкіметтің алаңдайтын жөні бар.

«Теріс салдарды азайту және ірі кен орындарындағы өндіріс қарқынын сақтау мақсатында, министрлік экспортты балама бағыттарға қайта бағыттау бойынша жедел жоспарды іске қосты», – деп мәлімдеді министрлік.

Ресми ақпаратта нақты балама бағыттар туралы ештеңе айтылмаған.

Министрлік дерегінше, 2025 жылғы 29 қарашада, Астана уақытымен сағат 06:06-да, Каспий құбыр Консорциумы (КҚК) теңіз инфрақұрылымының нысандары Новороссийск қаласы маңында дрондар шабуылына ұшырады. Соның салдарынан екінші сыртқы аялдау құрылғысы айтарлықтай зақымданды. Терминал істен шықты.

Қазақстан үкіметі жағдайды ерекше бақылауда ұстап отыр.