1 желтоқсаннан бастап жазғы дөңгелекпен жүруге тыйым салынады

1 желтоқсаннан 28 ақпанға дейін жазғы дөңгелекпен көлік жүргізуге тыйым салынады. Бұл – «Дөңгелекті көлік құралдарының қауіпсіздігі туралы» Кеден одағының техникалық регламентінде (ТР ТС) көрсетілген. Бұл туралы Kursiv.media kolesa.kz-ке сілтеме жасап хабарлайды.

Ал аталған техникалық регламенттің талаптарына сай келмейтін көлік құралдарын басқаруға болмайтыны жол жүру ережелерінде нақты жазылған.

Құжатқа сәйкес, қыс мезгілі бойы яғни, желтоқсан, қаңтар, ақпан айларында, ауа райына қарамастан, көлікте міндетті түрде бүртабан шиналар немесе үш шыңы бар тау белгісі, сондай-ақ «М+S», «M&S», «M S» (Mud and Snow — «балшық пен қар») белгісі бар шинамен жүруі керек.

Бұл талап барлық төрт дөңгелекке бірдей қолданылады, тек бір оське орнату жеткіліксіз. Сонымен қатар, жол жүру ережесі бойынша бір оське әртүрлі типтегі, өлшемдегі, әртүрлі протекторы бар, шегелі және шегесіз шиналарды қатар қоюға тыйым салынады. Қысқы шиналар үшін протектордың минималды тереңдігі 4 мм болуы тиіс. Одан аз болса , бұл талапқа сай емес деп есептеледі.

Айыппұл мөлшері

Қыс мезгілінде жазғы дөңгелекпен жүргені үшін айыппұл мөлшері 5 АЕК-ті құрайды. Бұл 2025 жылдың соңына дейін 19 660 теңге, ал 2026 жылы – 21 625 теңге болады.

Дөңгелек таңдағанда қандай факторларға мән беру керек?  Қазақстан жағдайына арналған ең қолайлы дөңгелектер қандай? Осы сұрақтардың жауабын Kursiv.media тілшісі әзірлеген материалдан толық оқып таныса аласыз.