ЕАЭО елдері көлік импортына бақылауды күшейту мәселесінде келісімге келе алмады
Еуразиялық экономикалық одақ (ЕАЭО) елдерінің үкімет басшылары кеңесінде Қазақстан азаматтар аукциондар арқылы сатып алған көліктерді, сондай-ақ көлік қауіпсіздігі сертификаттарының көшірмелерімен әкелінген автокөліктерді елге кіргізуге тыйым салуды ұсынды. Бұл туралы «Коммерсантъ» басылымы хабарлады.
Кеңес барысында ЕАЭО елдері арасындағы сауданы заңдастыру мәселелері талқыланды. Ең даулы ұсыныстардың бірі – Қазақстан тарапының онлайн-аукциондар арқылы сатып алынған және сертификат көшірмесімен әкелінетін көліктерді импорттауға тыйым салу туралы бастамасы болды. Бұл бастамаға Қырғызстан қарсылық білдірді, себебі ол елде дәл осы тәсілмен көлік әкелу кең таралған.
Бұл мәселені мемлекет басшыларының деңгейінде талқылау туралы шешім қабылданды.
Сондай-ақ Қазақстан премьер-министрі Олжас Бектенов өнеркәсіптік кооперация механизмін жетілдіруді ұсынды. Ол заманауи технологиялар мен жасанды интеллектті қолданатын кәсіпорындарға басым субсидия беру қарастырылуы тиіс екенін айтты. Бұл ЕАЭО-ның демпингке қарсы баж салығынан түсетін қаражаттың 10%-ы есебінен жобаларға несие беру субсидиясына қатысты болып отыр.
Сонымен қатар Еуразиялық экономикалық кеңес тауарларды таңбалау жүйесін дамыту жоспарын мақұлдады. Енді елдер заңсыз импортталған немесе өндірісі дәлелденбеген өнімдерге таңбалау қолдану мүмкіндігін алып тастағысы келеді.
Осыған дейін Еуразиялық экономикалық комиссия ЕАЭО елдеріне электромобильдерді кедендік бажсыз әкелу квотасын 2026 жылдың соңына дейін ұзарту туралы келіссөздер жүргізіп жатқаны хабарланған еді.
