Полиция «ҚазТАГ» бас редакторының ұсталуына қатысты пікір білдірді
«ҚазТАГ» агенттігінің бас редакторы Әмір Қасенов 2025 жылғы 23 желтоқсанда Астана қалалық полиция департаментінің уақытша ұстау изоляторына қамалды.
Бұл туралы «Курсивке» Алматы қалалық полиция департаменті хабарлады.
Ведомствоның мәліметінше, «ҚазТАГ» редакциясының қызметкерлеріне қатысты қылмыстық іс «жеке компанияның іскерлік мүддесі мен беделіне елеулі зиян келтірген, көрінеу жалған ақпаратты бірнеше рет таратты» деген фактілер бойынша қозғалған. Әңгіме Freedom Finance брокерлік компаниясы туралы болып отыр.
Материалдардың жиынтығы
«Тергеу барысында тергеу әрекеттері қылмыстық-процестік заңнама талаптарына сай кезең-кезеңімен жүргізілді. Жиналған материалдардың жиынтығын, тергеу сатысын және заңда көзделген негіздерді ескере отырып, биылғы 23 желтоқсанда «ҚазТАГ» агенттігінің бас редакторы ұсталып, Астана қаласы полиция департаментінің уақытша ұстау изоляторына қамалды», – делінген хабарламада.
Сондай-ақ полиция департаментінде тергеу әрекеттері Қазақстан Республикасының Қылмыстық-процестік кодексінің талаптарына сәйкес жүргізіліп жатқанын атап өтті. ҚР ҚПК-нің 201-бабына сәйкес, өзге ақпарат жариялауға жатпайды.
Еске салайық, 23 желтоқсан кешке қарай Әмір Қасеновтің ұсталғаны белгілі болған еді.
Барлығы неден басталды
«ҚазТАГ» агенттігінің бас редакторы Әмір Қасенов Freedom Holding Corp. компаниясының қызметіне арналған жарияланымдар топтамасының жарыққа шығуын қадағалаған. 2024-2025 жылдары агенттік жүзден астам материал жариялап, онда компанияның бұрынғы қызметкерлеріне қатысты қылмыстық істер, холдинг басшылығына «қаржы пирамидасын құрды» және қаражатты офшорлық аймақтарға шығарды деген айыптаулар, сондай-ақ брокерлік компания клиенттерінің қаражаты жоғалды деген тұжырымдар айтылған.
