Рим Папасы барлық соғысты тоқтатуға шақырды
Дәстүрлі «Қала мен әлемге» жолдауы барысында Рим Папасы Лев XIV Ресей мен Украинаны «шынайы, ашық және өзара құрметке негізделген диалог» жүргізу үшін «батылдық табуға» шақырды.
BBC ақпаратына қарағанда, Әулие Петр соборының орталық балконынан алаңға жиналған мыңдаған адам алдында сөйлеген ол Украина, Судан, Мали, Мьянма, Таиланд, Камбоджа және өзге де елдердегі саяси, әлеуметтік және әскери қақтығыстарға алаңдаушылық білдірді.
Понтифик Украинада, Ресей әскерлері елдің шығыс бөлігін қорғауда стратегиялық маңызы бар қалаларға қауіп төндіріп отырған жағдайда, халықтың зорлық-зомбылықтан «азап шегіп жатқанын» айтты.
«Қару-жарақтың үні өшсін. Ал қақтығысқа тартылған тараптар халықаралық қауымдастықтың қолдауы мен қатысуы арқылы шынайы, тікелей әрі құрметті диалогқа баруға батылдық тапсын», – деді Рим Папасы.
Лев XIV Таиланд пен Камбоджаға қатысты, шекаралық қақтығыстар үшінші аптаға созылып, кемінде 80 адамның өмірін қиғанын атап өтті. Бұл елдерді «көптен келе жатқан достықты» қалпына келтіруге, «татуласу мен бейбітшілік жолында жұмыс істеуге» шақырды.
Сондай-ақ понтифик Америка құрлығын кесіп өтіп жүрген мигранттар мен босқындардың жағдайына да алаңдаушылық білдірді.
Мұның алдында Сенат спикері Мәулен Әшімбаев Рим Папасын Қазақстанға шақырған еді.
