Қазақстан президенті Қасым-Жомарт Тоқаев «Түркістан» газетіне берген сұхбатында зейнетақы жинағын медициналық қызметке пайдалануға тыйым салу себебін түсіндірді.
2021 жылы азаматтарға зейнетақы қорындағы қаражатты емге пайдалануға рұқсат берілген. Алайда үкімет 2025 жылы ережені қатайтып, стоматологиялық қызметтің кей түріне өтініш қабылдауды уақытша тоқтатты. Тоқаев оның себебін алаяқтар әрекетімен түсіндірді.
«Мен кезінде баспана алу, балалардың оқу ақысын төлеу, емделу үшін зейнетақы жинағын пайдалануға рұқсат беру туралы шешім қабылдадым. Көбісі солай жасады, бұл шешімге ризашылықтарын да білдіріп жатты.
Бірақ, әдеттегідей, стоматология қызметін көрсетеміз деген желеумен зейнетақы қорынан 200 млрд теңгеден астам қаржы жымқырған алаяқтар да табылды. Құқық қорғау органдары қазір бұл мәселемен айналысып жатыр. Осы медициналық қызмет түріне зейнетақы жинағын пайдалануға тыйым салуға тура келді», – дейді мемлекет басшысы.
Тоқаев қордан ақша шығарудың «басқа да қитұрқы тәсілдері пайда болғанын», тіпті пластикалық отаға төлем жасайтындар шыққанын атап өтті.
Зейнетақы қорындағы ақшамен тіс емдетуге өтініш қабылдау 2026 жылғы 15 сәуірден кейін қайта рұқсат етілуі мүмкін.
Азаматтар 2025 жылы зейнетақы қорынан тұрғын үй мен ем-домға 1 трлн теңге алған.
Бұған дейін БЖЗҚ қорда қалуға тиіс қаражат шегін көтерген. Қордан қаражат алу көбейіп кеткен соң, қор қаражатын пластикалық ота, стоматология мен офтальмологияға пайдалану тоқтатылған.
