Батыс Қазақстанда салықшылар шекарадан тауар өткізу үшін 100 млн теңге пара алған

Батыс Қазақстан облысында лауазымды тұлғалар шекарадан заңсыз тауар өткізу үшін 100 млн теңге пара алған. Олардың қатарында Мемлекеттік кіріс департаменті басқарма басшыларының бірі және астаналық тұрғын бар. Бұл туралы ҰҚК-ден хабарлады.

«Көрсетілген тұлғалар ақшалай сыйақыға елге халық тұтынатын тауарларды кедергісіз әкелу үшін шетелдік азаматтарға көмек көрсеткен. Олардың 100 млн теңгеден астам пара алғаны процестік тұрғыдан құжатталған», – деп жазылған хабарламада.

Қазір күдіктілер қамауға алынды. Алдын ала есеп бойынша, олардың әрекетінен мемлекетке 1,9 млрд теңге шығын келген.

Комитет қылмыстық-процестік кодекстің 201-бабына сілтеп өзге ақпарат жарияланбайтынын жеткізді.

2025 жылдың есебі бойынша, елде сыбайлас жемқорлыққа қатысы бар 900-ге жуық адам әшкереленген. Тергеу барысында мемлекетке 16,1 млрд теңге қайтарылған.