Конституциялық реформа шеңберінде Парламенттің өкілеттігі талқыланды

Астанада мемлекеттік кеңесші Ерлан Қариннің төрағалығымен Парламенттік реформа жөніндегі жұмыс тобының бесінші отырысы өтті, деп хабарлады Ақорда.

Отырыста парламентаризм институтының директоры Наталья Пан азаматтардан, сарапшылар қауымдастығынан және қоғам белсенділерінен келетін ұсыныстар туралы жалпылама ақпарат берді. Өткен жылдың қазан айынан бастап «Парламенттік реформа» арнайы бөлімі арқылы e-Otinish және eGov платформаларында 600-ге жуық бастама жіберілді.

Ұсыныс авторларының қатарында «Байтақ» партиясы, «Жаңару» сыбайлас жемқорлыққа қарсы жалпыұлттық қозғалысы, Республикалық адвокаттар алқасы, Toqtamys адвокаттар қауымдастығы, Халықаралық төрелік және медиация палатасы, парламентаризмді дамыту қоры, татарлар мен башқұрттардың қазақстандық конгресі, экономикалық саясат институты, «Азаматтық бастама» бастамашыл тобы, сондай-ақ, басқа да ұйымдар мен бірлестіктер бар. Сонымен қатар, ұсыныстарды дайындауға өздерінің сараптамалық ұсыныстарын жіберетін заңгер ғалымдар белсенді қатысады.

Парламентаризм институты парламенттік реформа жөніндегі бастамалармен қатар азаматтар мен қоғамдық бірлестіктерден конституциялық реформаға қатысты ұсыныстар келіп түсетінін де атап өтті.

Жұмыс тобы басшысының орынбасары-президенттің құқықтық мәселелер жөніндегі көмекшісі Ержан Жиенбаев Парламенттің Үкіметті, Конституциялық сотты, жоғары аудиторлық палатаны, Орталық сайлау комиссиясын және басқа да мемлекеттік органдарды қалыптастыруға қатысуының конституциялық рәсімдеріне жалпы көзқарастарды ұсынды. Бұл тәсілдер жұмыс тобы мүшелері мен саяси партиялардың ұсыныстары негізінде жасалды.

Отырыс қорытындысы бойынша жұмыс тобының басшысы Ерлан Карин конституциялық реформа мәселелері бойынша қорытынды тәсілдерді әзірлеу үшін келіп түскен барлық ұсыныстарды жинақтап, талдауды тапсырды.

Айта кетейік, Конституцияға өзгерістер енгізу жөніндегі түпкілікті шешім жалпыхалықтық референдумға шығарылатын жазған едік.