Қазақстан мен Пәкістан 200 миллион долларлық келісімге қол қойды
Исламабадта мемлекет басшыларының қатысуымен Қазақстан-Пәкістан бизнес-форумы өтті. Жиын барысында екі ел арасындағы экономикалық байланыстарды жаңа деңгейге шығаратын маңызды құжаттар қабылданды.
Ақорданың баспасөз қызметі хабарлағандай, форум жұмысына Қазақстан президенті Қасым-Жомарт Тоқаев пен Пәкістан премьер-министрі Шахбаз Шариф қатысты. Мемлекет басшысы өз сөзінде бұл сапардың екіжақты қарым-қатынас үшін маңызы зор екенін атап өтті.
Стратегиялық серіктестік және сауда
Қасым-Жомарт Тоқаев Пәкістанға жасаған алғашқы мемлекеттік сапарын тарихи белес деп атады:
«Пәкістанға жасаған алғашқы мемлекеттік сапарымды екіжақты ынтымақтастығымыздағы тарихи белес деп санаймын. Біз серіктестігімізді стратегиялық деңгейге шығаратын Бірлескен декларацияға қол қойдық. Бүгінгі бизнес-форум барысында жалпы сомасы шамамен 200 миллион доллар болатын 30-дан астам коммерциялық келісімге қол қойылды. Бұл бауырлас халықтардың сауда-экономикалық және инвестициялық өзара іс-қимылын одан ары нығайтуға қуатты серпін береді», — деді Президент.
Өткен жылы екі ел арасындағы тауар айналымы екі есеге жуық өскен. Қазіргі таңда Қазақстанда құрылыс, ауыл шаруашылығы және өнеркәсіп салаларында пәкістандық капиталдың қатысуымен 200-ден астам компания жұмыс істеп жатыр. Осыған байланысты Президент жаңа межені белгіледі:
«Осы оң динамикаға сүйене отырып, біз екіжақты сауда көлемін 1 миллиард долларға дейін жеткізу туралы өршіл, бірақ толық орындалатын мақсат қойдық».
Экономикалық әлеует және инвестициялық климат
Қазақстан Орталық Азиядағы ең ірі экономика ретінде аймақтық өсімнің қозғаушы күші болып қала бермек. Мемлекет басшысы ел экономикасының тұрақтылығын айғақтайтын көрсеткіштерге тоқталды:
«Бұл көрсеткіштер біздің нарықтың тұрақтылығын және оның жоғары экономикалық әлеуетін көрсетеді. Біз институционалдық құрылымдарымызды дәйекті түрде жетілдіре отырып, прогресті сақтауға ниеттіміз. Біздің экономикалық стратегиямыз сауда мен инвестицияларды әртараптандыруға, инновацияларды ынталандыруға және білімге негізделген даму моделін ілгерілетуге бағытталған. Мен басқаратын Шетелдік инвесторлар кеңесі Қазақстандағы ашықтық, әділдік және іскерлік климатты үнемі жақсарту қағидаттарына айнымас адалдығымызды көрсетеді. «Бір терезе» қағидаты бойынша жұмыс істейтін Ұлттық цифрлық инвестициялық платформа инвесторлар үшін де, бизнес үшін де процестерді одан ары жеңілдетеді», — деді Қасым-Жомарт Тоқаев.
Көлік және логистика: Жаңа мүмкіндіктер
Президент Қазақстан мен Пәкістанның стратегиялық географиялық орналасуы аймақтық байланыстарды нығайтуда шешуші рөл атқаратынын айтты. Әсіресе, Транскаспий халықаралық көлік маршруты (Орта дәліз) мен цифрлық шешімдерге басымдық берілді:
«Еуразияның орталығында орналасқан Қазақстан Еуропа мен Қытай арасындағы құрлықтағы жүк тасымалының 85 пайызын қамтамасыз етіп, құрлықтық саудада маңызды рөл атқарады. Транскаспий халықаралық көлік маршруты немесе Орта дәліз Қазақстанның трансконтиненталдық сауда хабы ретіндегі рөлін нығайтудың маңызды факторы болып табылады. Біз сондай-ақ транзиттік ағындарды тиімдірек үйлестіру үшін Smart Cargo бірыңғай цифрлық басқару платформасын әзірледік. Осыған байланысты біздің ұлттық теміржол операторымыз «Қазақстан Темір Жолы» мен «Қазпошта» АҚ-ның Пәкістанның Ұлттық логистикалық корпорациясымен және Pakistan Post-пен қол қойған келісімдерін құптаймын. Мультимодалды көлік шешімдерін дамыту және порт инфрақұрылымына өзара қолжетімділікті кеңейту бойынша нақты қадамдар күтеміз», — деп мәлімдеді Президент.
Бизнес-форум аясында қол қойылған 30-дан астам коммерциялық құжат қаржы, логистика, өнеркәсіп, энергетика, агроөнеркәсіптік кешен, цифрландыру және инфрақұрылым салаларын қамтиды. Бұл келісімдер алдағы жылдары екі ел арасындағы тауар айналымы мен инвестиция ағынын еселеуге мүмкіндік бермек.
