Қарғалыдағы жантүршігерлік жол апаты: төрт адам көз жұмды
Жарияланды
Ақтөбе облысының Қарғалы ауданында жол-көлік оқиғасы болып, төрт адам көз жұмды. Аталған факті бойынша сотқа дейінгі тергеп-тексеру басталды.
Алдын ала мәліметке сәйкес, Ақтөбе – Орск автожолында Opel маркалы жеңіл көліктің жүргізушісі қарсы бағытқа шығып, DAF жүк көлігімен соқтығысқан.
«Жол-көлік оқиғасы салдарынан жеңіл автокөліктің жүргізушісі мен үш жолаушысы оқиға орнында көз жұмды», – делінген хабарламада.
Қазіргі уақытта жол апатының себептері мен мән-жайы анықталып жатыр.
Еске сала кетейік, мұның алдында Алматыда жол апаты болды. Мәліметке сәйкес, BYD такси көлігінің жүргізушінің жүрегі тоқтап қалған.
