FlyArystan қол жүгіне қатысты тергеуге пікір білдіруден бас тартты
FlyArystan әуе компаниясы тергеудің ресми шешімі шыққанға дейін қандай да бір пікір білдіруден бас тартады. Бұл туралы компания баспасөз қызметі хабарлады.
Әуекомпания өкілдерінің айтуынша, қосымша қызметтер үшін бекітілген тарифтерді қолдану тәсілі әлемдік авиация саласында кеңінен таралған лоукост (төмен бюджетті) бизнес-моделінің негізгі қағидаттарына толықтай сәйкес келеді. Бұл модель жолаушыларға қажетті қызметтер пакетін өздігінен таңдауға мүмкіндік береді
«FlyArystan өз қызметінің ашықтығын қамтамасыз етуге басымдық береді. Қосымша қызметтерді ұсыну шарттары туралы барлық мәліметтер интернет-ресурстарында көрсетілген», – делінген жауапта.
Әуекомпания жолаушылардың брондау барысында қызмет көрсету талаптарымен мұқият таныса алатынын және барлық тарифтік саясаттың қолданыстағы халықаралық стандарттарға сай екенін атап өтті.
Бұған дейін FlyArystan-ның қол жүгіне ақы белгілеу тәртібі тексеріліп жатқаны хабарланған. Монополиямен күресетін мекеме компания әрекеті тұтынушылар құқығын шектейді деп есептейді.
Бәсекелестікті қорғау және дамыту агенттігі қалалық басқармасының басшысы Нұржан Нұрланұлының айтуынша, мекеме FlyArystan артық мөлшер үшін өте қымбат ақы алғанын анықтаған.
