Өзбекстан алғашқы ғарышкерін дайындап жатыр

Шавкат Мирзиёев елдің алғашқы ұлттық ғарышкерін дайындау жөніндегі алғашқы қадамдарға арналған таныстырылыммен танысты.

Kun.uz ақпаратына қарағанда, жоба аясында өзбекстандық ғарышкерді 10-14 күндік ғарыш сапарына жіберу және миссияны жүзеге асыру үшін халықаралық әріптестік орнату ұсынылған.

Баяндама барысында өзбек президентінің бастамасымен алғашқы ұлттық ғарышкерді даярлау стратегиялық міндет ретінде белгіленгені айтылды. Президент бұл бастаманың тек символдық мәні емес, елдің ғылыми әлеуетін, жастардың арманын және ұлттық мақтанышын көрсететін маңызды жоба екенін атап өтті.

Жоспарланған миссия нақты ғылыми бағдарламамен байланыстырылуы тиіс. Сарапшылардың пікірінше, бұл жоба Өзбекстанның халықаралық беделін арттырып, ғылым мен технологияның дамуына жаңа серпін береді.

Сонымен қатар 2028 жылы халықаралық ғарыш конгресін Самарканд қаласында өткізу мәселесі қарастырылған. Кездесуге АҚШ, Еуропа, Қытай, Үндістан, Ресей және басқа да елдердің жетекші ғарыш ұйымдары қызығушылық танытып отырғаны айтылды.

Кездесу қорытындысында президент ұлттық ғарышкерді дайындау бойынша нақты есептеулер мен практикалық ұсыныстарды мұқият әзірлеуді тапсырды.

Мұның алдында Байқоңыр айлағынан NASA ғарышкері ғарыш стансасына ұшқан болатын.