Алтынкөл – Қорғас бағытының өткізу қабілеті екі есеге жуық артады
Алтынкөл – Қорғас торабының өткізу қабілеті екі есеге жуық артады. Бұл туралы көлік министрлігі хабарлады.
«Алтынкөл станциясы мен Қорғас шекаралық өткелі бірыңғай теміржол-шекаралық кешенді құрайды және халықаралық көлік дәлізінің маңызды буыны саналады. Алтынкөл – Қорғас торабы арқылы экспорт-импорт және транзиттік жүк тасымалының едәуір көлемі жүзеге асырылады», – деп мәлімдеді министрлік.
Бұл торап елдің транзиттік әлеуетін арттыруда ерекше рөл атқарады. Инфрақұрылым жүктерді жедел өңдеуді, контейнерлерді қайта тиеуді және екі мемлекеттің теміржол қызметтерінің үйлесімді жұмысын қамтамасыз етеді.
«Қазір ауқымды жаңғырту бағдарламасы іске асырылып жатыр. Алтынкөл – Жетіген учаскесінде жалпы ұзындығы 32 шақырымды құрайтын екі аралықта екінші жолдардың құрылысы жалғасып жатыр, сондай-ақ 5 жаңа және 8 қолданыстағы айырықты дамыту жұмыстары жүргізіліп жатыр. Бұл желінің өткізу қабілетін тәулігіне 18 жұп пойыздан 33 жұп пойызға дейін арттыруға мүмкіндік береді», – делінген ақпаратта.
Жоба 2026 жылы аяқталады деп жоспарланған. Ресми ақпаратқа сәйкес, жобаны іске қосу Қазақстанның Еуропа мен Азия арасындағы транзиттік көпір ретіндегі стратегиялық рөлін күшейтеді.
