Қызылжар соты Украинадағы соғысқа қатысқан Қазақстан азаматына үкім шығарды

Қылмыстық іс Солтүстік Қазақстан облысының Қызылжар аудандық сотында қаралған. Өңір тұрғыны Евгений Люфт шетелдегі қарулы қақтығысқа қасақана қатысқаны үшін кінәлі деп танылып, алты жылға бас бостандығынан айырылды.

Жергілікті Qazaqstan Media басылымының жазуынша, сот «табыс табу үшін» елден шығудан бастап, Украинаның Бахмут қаласы маңындағы шайқастарға дейінгі оқиғалар тізбегін жан-жақты зерттеген.

Іс материалдарына сәйкес, былтыр 2 ақпанда 25 жастағы Евгений Люфт Петропавлдан пойызбен Ресейге аттанған. Оның сөзінше, бұған қаржылық қарыздары түрткі болған.

Мәскеудегі Ленинград вокзалында Евгений Люфт өзін еріктілер ретінде таныстырған адамдармен кездескен. Олар арнайы әскери операцияға (СВО) еріктілерді іріктеп жүрген.

«Олар қатысқан жағдайда Ресей Федерациясының азаматтығын жеделдетілген тәртіппен алуға, жер телімін рәсімдеуге көмектесетінін, ал қаза тапқан жағдайда туыстарына ақшалай өтемақы төленетінін айтты», – деп түсіндірді сотталушы сот отырысында.

Кейін еріктілермен бірге Евгений Нижний Новгородқа барған. Құжаттары тексерілген кезеңде медициналық комиссиядан өтіп, бастапқы әскери даярлықтан өткен.

2025 жылғы 17 ақпанда ол Ресей қорғаныс министрлігімен бір жылдық келісімшартқа отырып, жетон мен қатардағы жауынгер әскери атағын алған. Ол 1307-гвардиялық мотоатқыштар полкінде «штурмовик-сапер» болып тағайындалған. Кейін солтүстікқазақстандық Ростов облысында қосымша дайындықтан өткен. Оған «Питер» деген шақыру белгісі беріліп, алдымен Луганскке, кейін Бахмут маңына жіберілген. Сол жақтағы шайқастарға қатысқан.

Евгений Люфттің әрекеттері Қылмыстық кодекстің 172-бабы бойынша (Қазақстан азаматының шетелдегі қарулы қақтығысқа қасақана қатысуы) сараланды. Сот оны алты жыл мерзімге бас бостандығынан айыру жазасына кесті. Үкім әзірге заңды күшіне енген жоқ.