Алматыда көп деңгейлі автотұрақтар салынбайды

Әкімдікке тиесілі және ақылы автотұрақтарды басқаратын «Алматы паркинг» компаниясы қалада көп деңгейлі автотұрақтар салу жоспарынан бас тартты. Көктем-3 шағынауданында бір ғана жоба қаралуда, деп хабарлады Kazinform агенттігі.

«Алматы паркинг» агенттікке Самал-1 шағын ауданында бұрын қарастырылып отырған механикалы тұрақ салу жобасы қоғамдық талқылаулардан кейін жойылғанын хабарлады. Көктем-3 шағынауданында 207 орындық тағы бір жоспарланған көп деңгейлі тұрақ әлі де қаралу сатысында.

«Бұдан бөлек, қалада көп деңгейлі автотұрақ салу жоспарланбаған. Жаңа жобалар пайда болған жағдайда ақпарат қосымша жарияланады», – деп хабарлады компания.

Қалада барлығы 17,8 мың ақылы тұрақ орындары жұмыс істейді. Оның ішінде Алмалы ауданында – 5,4 мың және Медеу ауданында – 5,1 мыңы көп, бұл ретте «Алматыда паркинг» қаладағы барлық автотұрақтарды ақылы ету мақсатын қоймайды.

Қазіргі уақытта компания тарифтерді көтеруді жоспарламайды. Сонымен қатар, мамандар бағаны үнемі бақылап отырады.

Естеріңізге сала кетейік, 2023 жылдың ақпан айында Алматы әкімі Ерболат Досаев қалада 267 тұраққа арналған алғашқы көп деңгейлі муниципалды паркинг салу жоспарланып отырғанын хабарлады. Оның құрылысы жыл соңына дейін аяқталуы керек еді. Айта кетейік, 2019 жылы «А-Паркинг» компаниясы көп деңгейлі тұрақтар жобасын ұсынды.