Таяу Шығыстағы жағдайдан кейін Роналду Сауд Арабиясынан ұшып кетті
Португалиялық футбол жұлдызы Криштиану Роналду мінген жекеменшік ұшақ Сауд Арабиясынан Испанияға бағыт алды. Бұл туралы The Sun хабарлады.
Әуе рейстерін бақылау сервистерінің мәліметінше, Bombardier Global Express 6500 бизнес-джеті 2 наурыз күні шамамен 20:00-де Рияд қаласынан ұшып шығып, 3 наурызға қараған түні 01:00 шамасында Мадрид әуежайына қонған. Ұшу уақыты шамамен жеті сағатқа созылған.
Аймақтағы әскери жағдайдың ушығуына байланысты шетелдік азаматтар өңірден жаппай кетіп жатқаны айтылады. Кейбір рейстер Эр-Риядқа жетпей кері қайтарылған. Сондай-ақ Мысырдың шығысында жүрген азаматтарға аймақтан шұғыл шығу ұсынылған.
АФК матчтарды кейінге қалдырды
Роналдудың ұшып кетуі Азия футбол конфедерациясының шешімімен тұспа-тұс келді. Ұйым Парсы шығанағы елдеріндегі сегіз матчты кейінге шегерген. Оның ішінде Әл Наср мен Әл Васл арасындағы АЧЛ ширек финал ойыны да бар еді.
АФК Батыс аймақта 2–3 наурызға жоспарланған Чемпиондар лигасының 1/8 финалындағы алғашқы матчтардың барлығын қауіпсіздік мақсатында кейінге қалдырды. Ал Шығыс аймақтағы кездесулер әзірге өз күшінде.
Эр-Риядтағы жағдай
3 наурыз таңертең АҚШ елшілігіне екі дронмен шабуыл жасалғаны хабарланды. Сауд Арабиясының Қорғаныс министрлігі шағын өрт болғанын, материалдық шығын аз екенін және зардап шеккендер жоқ екенін мәлімдеді.
Иран АҚШ пен Израильдің бірлескен соққыларына жауап ретінде зымыран және дрон шабуылдарын бастағаны айтылуда.
Роналдудың жағдайы
Қазіргі уақытта футболшының нақты қайда екені туралы ресми мәлімдеме жасалмады. Роналду Эр-Риядта жұбайы Джорджина Родригеспен және бес баласымен бірге тұрып келген.
Биылғы маусымда Криштиану Роналду Әл-Наср сапында 26 матчта 22 гол соққан. Оның саудиялық клубпен келісімшарты 2027 жылға дейін жарамды.
Еске сала кетейік, бұған дейін Роналду испаниялық «Алмерия» футбол клубын сатып алғаны туралы жазған едік.
