«Челси» Дастан Сәтбаевты ұлттық құрама сапына жібермеді

Қазақстандық жас талант Дастан Сәтбаев наурыз айында өтетін халықаралық матчтарда ұлттық құрамаға көмектесе алмайды. Лондондық «Челси» клубы футболшының денсаулығына байланысты оны жіберуден бас тартты.

Медициналық штабтың шешімі

Ұлттық құраманың бас бапкері Талғат Байсуфиновтың айтуынша, бұл шешім «Челсидің» ресми ұсынысынан кейін қабылданған. Ағылшын клубы футболшының қазіргі жағдайы мен наурыздағы халықаралық үзіліс кезінде толық қалпына келуі қажет екенін алға тартқан.

«Біз «Челси» клубының медициналық штабынан Сәтбаевты қалпына келтіру қажеттігі туралы ұсыныс алдық. Қазақстан құрамасының дәрігерлерімен ақылдаса келе, ойыншыға толық сауығуға мүмкіндік беру туралы шешімге келдік», – деді Байсуфинов.

Сәтбаевтың орнын кім басады?

Дастан Сәтбаевтың орнына ұлттық құрама сапына Оралхан Өміртаев шұғыл шақырылды. Бапкерлер штабы Өміртаевтың қазіргі таңда жақсы формада екенін және алдағы FIFA Series 2026 турнирінде командаға пайдасын тигізетініне сенімді.

Еске сала кетейік, Қазақстан құрамасы 25 наурыз күні «Астана Аренада» Намибияға қарсы ойнайды. Матч сағат 17:00-де басталады. Билеттерді «Яндекс Афиша» сайтынан алуға болады.