Студенттердің шәкіртақысы қашан өседі – министр жауабы

Қазақстанда студенттердің шәкіртақысын жыл сайын көтеру қайта қаралады. Бұл мәселе үкімет деңгейінде пысықталады. Бұл туралы Ғылым және жоғары білім министрі Саясат Нұрбек айтты.

Оның айтуынша, соңғы бес жыл ішінде шәкіртақы кезең-кезеңімен көтерілген.

«Жыл сайын 20–25% мөлшерінде өсім болды. 2025 жылы бұл бағдарлама аяқталды, ал осы уақыт аралығындағы жалпы өсім 100%-ды құрады», – деді ведомство басшысы үкімет брифингінде.

Енді министрлік үкіметпен бірге стипендияларды арттырудың жаңа кезеңін талқылауды жоспарлап отыр. Әзірге түпкілікті шешім қабылданған жоқ.

Қазір студенттер қанша шәкіртақы алады

• PhD докторанттары: айына шамамен 254 мың теңге;
• Бакалавриат студенттері (ең төменгі мөлшер): шамамен 55 мың теңге (болашақ педагогтерге берілетін қосымша төлемдерді есептемегенде).

Университеттерде оқу ақысы өсе ме?

Министр қосылған құн салығы (ҚҚС) өзгергеннен кейін оқу ақысының құнына қатысты да пікір білдірді.

«Мемлекеттік жоғары оқу орындарында күрт қымбаттау күтілмейді. Бағалар реттеледі, ал ықтимал өсім инфляция деңгейімен шектеледі, ол 10%-дан аспайды», – деп сендірді министр.

Айта кетейік, студенттердің ЖИ көмегімен жазған курстық жұмысын жаңа антиплагиат жүйесі тексереді.