Теңіз кен орны өндірісті 19%-ға ұлғайтты

Теңіз кен орнындағы өндірістің қалпына келуіне байланысты Қазақстанда наурыз айында мұнай мен газ конденсатын тәуліктік өндіру көлемі 1,87 миллион баррельге жетті. Бұл ақпан айындағы көрсеткішпен (1,83 млн баррель) салыстырғанда 2%-ға артық. Бұл туралы Reuters хабарлады.

Мәліметтерге сәйкес, Теңіз кен орнындағы өндіріс көлемі ақпандағы тәулігіне 590 000 баррельден наурызда орташа есеппен 700 000 баррельге (+19%) дейін өскен. Ал 31 наурыз күні өндіріс көрсеткіші тәулігіне 978 000 баррельге жетіп, орташа айлық жоспарланған 930 000 баррельден асып түсті.

Қазақстан Энергетика министрлігі, «ҚазТрансОйл» және Теңіз операторы «Теңізшевройл» (ТШО) компаниялары Рейтер агенттігінің түсініктеме беру туралы сауалына әзірге жауап берген жоқ.

Кедергілер мен квоталар

Сала мамандарының айтуынша, ТШО биылғы өндіріс жоспарынан қалып келеді. Бұған 18 қаңтардағы электр жабдықтарының өртенуі салдарынан өндірістің тоқтауы, сондай-ақ қолайсыз ауа райы мен дрон шабуылдарына байланысты Каспий құбыр консорциумы (КҚК) жүйесіндегі шектеулер себеп болған.

Рейтер агенттігінің дереккөз мәліметтеріне негізделген бағалауы бойынша, наурызда Қазақстандағы таза мұнай өндірісі (газ конденсатын есепке алмағанда) тәулігіне 1,64 миллион баррельді құрады (ақпанда 1,58 млн). Айта кетейік, ОПЕК+ келісімі аясында Қазақстанның ағымдағы жылдың қаңтар-наурыз айларына арналған квотасы тәулігіне 1,569 миллион баррель деңгейінде бекітілген болатын.

Экспорттық бағыттар: Батуми мен Усть-Луга

Наурыз айында ТШО үш жылдық үзілістен кейін Батуми мұнай терминалы (БМТ) арқылы экспортты қайта бастап, 23 күн ішінде шамамен 70 000 тонна шикізат жөнелтті.

Сонымен қатар, Теңіз мұнайының бір бөлігі «Транснефть» жүйесі арқылы Балтық теңізіндегі Усть-Луга портына бағытталған еді. Алайда, 25 наурыздан бастап терминалға жасалған бірнеше дрон шабуылы салдарынан порт жұмысы уақытша тоқтатылды.

«Усть-Луга портында кемелерді тиеу 2026 жылғы 25 наурыздан бастап шығынды бағалау және қалпына келтіру жұмыстарын жүргізу үшін белгісіз мерзімге шегерілді», – деп келтіреді дереккөз «ҚазТрансОйл» көлік компаниясынан алынған хабарламаны.

ТШО акционерлері

Келешекте кеңейту жобасы (ККЖ) аяқталғаннан кейін Теңіздегі мұнай өндірісі 2024 жылғы 27,8 миллион тоннадан (тәулігіне 605 000 баррель) 2025 жылы 39 миллион тоннаға (тәулігіне 851 000 баррель) дейін ұлғайды.

Еске сала кетейік, Ресей Каспий құбыр консорциумы (КҚК) жүйесі арқылы Қазақстан мұнайының транзитіне кепіл болып қала береді, деп мәлімдеген болатын.