2030 жылға дейін жаңартылатын электр станцияларының тізімі жарияланды

Елде 11 электр станциясы жаңартылады. Энергетика министрлігінің хабарлауынша, жұмыс көмір генерациясын дамытуға арналған жаңа ұлттық жоба аясында іске асады.

Осылайша қолданыстағы энергия көздері техникалық жаңартудан өтеді. Олар:

• Ақсу ГРЭС-інің №7 энергоблогын жаңғырту (325 МВт);
• Екібастұз ГРЭС-2-де №3 және №4 энергоблоктарды салу (1 100 МВт);
• Қарағанды ЖЭО-сын кеңейту (140 МВт);
• Өскемен ЖЭО-сын кеңейту (100 МВт);
• Топар ГРЭС-ін жаңғырту (250 МВт);
• Шахтинск ЖЭО-сын кеңейту (130 МВт);
• Балқаш ЖЭО және Жезқазған ЖЭО-да турбоагрегат енгізу (50 МВт);
• Согра ЖЭО-сын кеңейту (50 МВт);
• «Qarmet» АҚ-ның ЖЭО-2-сін кеңейту (230 МВт);
• Степногорск ЖЭО-сын жаңғырту (30 МВт).

«Бұл жобаларды іске асыру нәтижесінде шамамен 2,5 ГВт көлемінде қосымша генерация қуаты енгізіліп, электр станцияларының тиімділігі артады және олардың қауіпсіз пайдалану мерзімі ұзартылады», – деп хабарлады министрлік.

Айта кетейік, 2026-2030 жылдарға арналған ұлттық жоба аясында жалпы қуаты 7,8 ГВт болатын нысандарды іске қосу жоспарланған. Бұл көрсеткішке 8 жаңа станция салу және жұмыс істеп тұрған 11 нысанды жаңарту есебінен қол жеткізілмек.