Астанада жас ғалымдар сайысы өтіп жатыр

Елордада жас ғалымдардың халықаралық сайысы басталды. 200 оқушы және 20 ғылыми жетекші қатысып отыр.

Байқауда Қазақстанның барлық өңірлерінен, сондай-ақ Қытай мен Түркия елдерінен келген жас ғалымдар бақ сынайды.

Оқу-ағарту министрлігінің ақпаратына қарағанда, бүгін Астанадағы №115 жалпы орта білім беретін мектеп базасында 9-11 (12) сынып оқушыларына арналған «Ғылым әлемін ашамыз» ғарыштық зерттеулер бойынша халықаралық ғылыми конкурс басталды. Шара сәуір айының 12-сі күні қорытындыланады.

«Зияткерлік сайыс Ғарышкерлер күні мен Ғылыми қызметкерлер күніне орай ұйымдастырылуда. Конкурсқа Қазақстанның барлық өңірлерінен, сондай-ақ Қытай мен Түркиядан шамамен 200 оқушы және 20 ғылыми жетекші қатысуда.Конкурстың негізгі мақсаты дарынды оқушыларды анықтау, дамыту және қолдау, жасөспірімдер арасында ғылыми-зерттеу қызметіне қызығушылықты арттыру, ғарыш саласындағы отандық және әлемдік жетістіктерді насихаттау, сондай-ақ халықаралық ғылыми ынтымақтастықты нығайту», – делінген хабарламада.

Ғылыми жарыс үш бағыт бойынша жүргізіледі. Атап айтқанда, AEROO Satellite Launch Competition аясында қатысушылар наноспутниктерді жобалап, құрастырып, ұшырады. Ал AEROO Space AI Competition секциясында жасанды интеллект технологияларын қолдана отырып, ғарыштық жобалар әзірленеді. «Күн жүйесі» AEROO Rocket Science Competition бағыты бойынша модельдік зымырандар құрастырылып, сынақтан өткізіледі.

Айта кететін жайт, Астанадағы Республикалық физика-математика мектебінің оқушысы Бөрте Сайранбекқызы Гарвард университетіне оқуға қабылданды.