СҚО-да колония бастығы алаяқтық үшін сотталды
Солтүстік Қазақстан облысының Ольшанка ауылында түзеу мекемесінің бұрынғы бастығына қатысты үкім шықты, деп жазады «ҚазАқпарат«.
2026 жылдың ақпан айында СҚО бойынша Қылмыстық-атқару жүйесі департаментінің №52 мекемесінің бастығы пара алды деген күдікпен ұсталған. Ол алаяқтыққа әрекеттену және пара беруге итермелеу баптары бойынша жауапқа тартылды.
Іс материалдарына сәйкес, 45 жастағы Рүстем Рахметов түзеу мекемесін 2024 жылдың желтоқсан айынан бастап басқарған. Өткен жылдың соңында ол жазасын өтеушінің үкімді жеңілдету туралы Қызылжар аудандық сотына өтініш бергенін біліп, оң шешім шығаруға ықпал ете алатынын айтқан. Рахметов бұл ақшаны алдау жолымен иемденбек болып, шенеуніктерге беру үшін 200 000 теңге көлемінде пара талап еткен.
Алайда сотталушы бұл туралы кейінірек СҚО бойынша ҰҚК департаментіне хабарлаған. Нәтижесінде 19 ақпанда Рахметов өз пәтерінде арнайы белгі салынған ақшаны алу кезінде ұсталды.
Айыпталушы өз кінәсін толық мойындады.
Петропавл қалалық соты оған негізгі жаза ретінде үш миллион теңге көлемінде айыппұл тағайындады. Бұдан бөлек, ол мемлекеттік қызметте, судья болып жұмыс істеу, жергілікті өзін-өзі басқару органдарында және квазимемлекеттік секторда қызмет ету құқығынан өмір бойына айырылды. Сондай-ақ, Рахметов «әділет подполковнигі» арнайы шенінен айырылды.
Сот айыппұлды үкім заңды күшіне енгеннен кейін бір ай ішінде төлеуді міндеттеді. Айыппұл төленбеген жағдайда, ол мәжбүрлі түрде өндіріледі, тіпті бас бостандығынан айыру жазасына ауыстырылуы мүмкін.
Сонымен қатар, одан мемлекет пайдасына 31 000 теңгеден астам сот шығындары және зардап шеккендер қорына 86 500 теңге өндірілді.
Үкім әлі заңды күшіне енген жоқ.
