Мұғалімдер эссе мен ғылыми мақалалардан босатылады

Оқу-ағарту министрлігі педагогтерді аттестаттау ережелерін қайта қарап жатыр. Ведомство мәлімдегендей, жаңашылдықтың басты мақсаты – артық жүктемені алып тастап, мұғалімдерді формальды талаптармен емес, нақты жұмысы бойынша бағалау.

Эссе мен ғылыми мақала

Процедурадан міндетті эссе, ғылыми мақалалар, авторлық бағдарламалар мен оқу-әдістемелік әзірлемелер алынып тасталады. Ведомство мұндай тапсырмалар уақытты босқа алғанымен, оқыту сапасына әсер етпеді деп санайды.

Тестілеу тәсілі де өзгереді. Педагогтердің басым бөлігі үшін ол жойылады. Тестті бұрынғысынша тек кәсіпке алғаш рет келгендер, жұмыстағы үзілістен кейін қайта оралғандар, сондай-ақ, мектеп басшылары, олардың орынбасарлары мен әдіскерлер тапсырады. Қалған жағдайларда мұғалімнің күнделікті жұмысы мен оқушылардың нәтижелеріне қосқан үлесі негізгі көрсеткіш болмақ.

Аттестация цифрлық форматқа көшеді

Аттестаттау толығымен цифрлық форматқа ауыстырылады. Ол мемлекеттік базалармен интеграцияланған «Ұстаз» платформасы арқылы өтеді. Жүйе еңбек өтілі, біліктілігі, жетістіктері мен сертификаттары туралы мәліметтерді өзі табады, құжаттарды қолмен жинаудың қажеті болмайды.

Бұл ретте төлемдер бойынша қолданыстағы ережелер сақталады. Тестілеуден өтіп, шекті бал жинаған және портфолио арқылы біліктілігін растаған педагогтер 1 қыркүйектен бастап қосымша ақы алады.

Екінші мүмкіндік және пилоттық іске қосу

Бірінші талпыныстан шекті бал жинай алмағандарға екінші мүмкіндік беріледі. Тестті шілде айында қайта тапсыруға болады. Егер нәтиже тағы да қажетті деңгейден төмен болса, санат берілмейді.

Балама нұсқа да бар. Тестті қайта тапсырғысы келмейтін мұғалімдер аттестаттаудан жаңа модель бойынша өте алады. Қыркүйек айынан бастап ол пилоттық режимде іске қосылады, қазіргі уақытта бұйрық жобасы келісу кезеңінде.

Сонымен қатар, ашық сабақтар саны мен біліктілікті арттыру сағаттары қысқарады. Негізгі екпін практикаға: жобаларға қатысуға, тәрбие жұмысына және тәжірибе алмасуға аударылады.

«Өтпелі кезеңде педагогтердің құқықтары сақталады. Жаңа жүйе мұғалімдерді артық есептіліктен босатып, басты нәрсеге — оқушылармен жұмыс істеуге көбірек уақыт беруі тиіс», – деп мәлімдеді Оқу-ағарту министрлігі.

ұған дейін министрлік мұғалімдерді аттестациялау барысындағы пәндік білімін бағалау (ПББ) тестін тапсырудан босату туралы шешім қабылданғанын мәлімдеді.