Алматыда нөсерге байланысты коммуналдық қызметтер күшейтілген режимге көшті
Алматыда жаңбыр мен найзағайға байланысты коммуналдық қызметтер жоғары дайындық режиміне ауыстырылды, деп хабарлады қалалық коммуналдық инфрақұрылым және тұрғын үй инспекциясы басқармасынан.
«Қазгидромет» РМК мәліметінше, 23 сәуір күні сағат 17:00-ден кейін қалада кей уақытта қатты жаңбыр жауып, желдің екпіні 15-18 м/с дейін жетеді деп болжануда. 24 сәуірде жаңбыр, кей жерлерде қатты жаңбыр жауып, найзағай күтіледі, ал 25 сәуірде күн құбылмалы болып, өткінші жауын-шашын болады.
Мүмкін болатын су басудың алдын алу және оларды жедел жою үшін қалалық қызметтердің тәулік бойы кезекшілігі ұйымдастырылды.
Жұмысқа тартылғандар:
- 104 бірлік арнайы техника;
- 74 мотопомпа;
- 12 ассенизатор машинасы (бір бөлігі су басу қаупі бар аймақтарға орналастырылған);
- 75 жедел бригада, оның ішінде 425 жол жұмысшысы;
- 2300 құм салынған қап дайындалды.
Қосымша Алматы құтқару қызметінің мамандары мен ТЖД бөлімшелері кезекшілікке кірісті.
«Қала бойынша барлығы 2,7 мыңнан астам жол жұмысшысы мен 1,2 мыңнан астам техниканың тәулік бойы шығуы қамтамасыз етілді», — деп хабарлады басқармадан.
Ведомство барлық қызметтердің тәулік бойы жұмыс істеп жатқанын және ауа райының өзгеруіне жедел әрекет етуге, сондай-ақ қаланың тыныс-тіршілігінің қауіпсіздігін қамтамасыз етуге дайын екенін атап өтті.
