ҰБТ-2026: Ең танымал пәндер комбинациясы белгілі болды

Қазақстанда негізгі ҰБТ-ға өтініш қабылдау аяқталды, деп хабарлады Ғылым және жоғары білім министрлігі.

Тестілеуге қатысу үшін шамамен 240 000 талапкер өтініш берді. Олардың ішінде ҰБТ тапсырушылардың 73%-ы тестілеуден қазақ тілінде, шамамен 27%-ы орыс тілінде, 521 адам ағылшын тілінде өтеді.

Пәндердің ең танымал комбинациясы «Математика – Физика» болды – оны талапкерлердің 17,9%-ы таңдаған, одан кейін «Биология – Химия» комбинациясы тұр – 14,5%, үшінші орында «Шығармашылық емтихан» – 12,4%.

Тестілеу 10 мамырда басталып, 10 шілдеге дейін жалғасады. Талапкерлер негізгі ҰБТ-ны екі рет тапсыра алады және гранттар байқауына ең жақсы нәтижемен қатыса алады.

Білім беру грантын алу үшін ҰБТ-ны екі рет тапсыру мүмкіндігі талапкерлерде 2022 жылы пайда болған еді, алайда жақында мұның жақын арада жойылатыны мәлімделді. Премьер-министрдің орынбасары – Мәдениет және ақпарат министрі Аида Балаева тестілеуді бірнеше рет тапсыру талапкерлерді сапалы іріктеу міндетін шешпейтінін атап өткен болатын.

2026 жылы ҰБТ форматы өзгеріссіз қалады:

• Талапкерлер үш міндетті пән және таңдау бойынша екі бейінді пән тапсырады.
• Тапсырмалардың жалпы саны – 120. Оның ішінде 20 тапсырма «Қазақстан тарихы» пәніне, 10 тапсырмадан «Оқу сауаттылығы» мен «Математикалық сауаттылыққа», сондай-ақ екі бейінді пәннің әрқайсысына 40 тапсырмадан келеді.
• ҰБТ-ның мүмкін болатын максималды нәтижесі – 140 балл.
• Тестілеу уақыты – 4 сағат (240 минут). Ерекше білім беру қажеттіліктері бар балалар үшін қосымша 40 минут уақыт сақталады.
• Емтихан кезінде тестілеу бағдарламасында калькулятор, химиялық элементтердің периодтық жүйесі және тұздардың ерігіштік кестесі қолжетімді болады.
• Талапкерлер апелляцияға тестілеу аяқталғаннан кейін 30 минут ішінде өтініш бере алады. Апелляцияға берген тестіленушінің сертификаты апелляциялық комиссия шешім қабылдағаннан кейін жеке кабинетте қолжетімді болады.

Жоғары оқу орындарына түсу үшін минималды шекті балдар да бұрынғы деңгейде қалады. Ұлттық жоғары оқу орындарына түсудің шекті балы – 65 балл, басқа жоғары оқу орындарына – 50 балл, «Педагогикалық ғылымдар» білім беру саласы бойынша – 75 балл, «Денсаулық сақтау» білім беру саласы бойынша – 70 балл, «Құқық» даярлау бағыты бойынша – 75 балл.