Мамырда Ұлттық банк Ұлттық қордан 500 млн доллар валюта сатпақ

Сәуір айында ұлттық валюта бағамы 1 АҚШ доллары үшін 463,09 теңгеге дейін, яғни 3,1%-ға нығайды. Бұл ретте Қазақстан қор биржасындағы белсенділік артып, бір күндегі орташа сауда-саттық көлемі 372 млн доллардан 394 млн долларға дейін жетті. Бір айлық жалпы айналым 8,7 млрд АҚШ долларын құраған.

Сәуір айында республикалық бюджетті трансферттермен қамтамасыз ету мақсатында Ұлттық қордан 300 млн АҚШ доллары көлемінде валюта сатылды.

Бұл көрсеткіш жалпы сауда-саттық көлемінің 3,5%-ын құрап, күніне орта есеппен 13,6 млн доллардан айналды.

Ұлттық Банк Үкіметтің өтініміне сәйкес, мамырда бюджет қажеттіліктері үшін Ұлттық қордан 400 – 500 млн долларға тең валюта сатпақ.

Сәуірде «айналау» операциялары аясында нарықтан шамамен 354 млрд теңге алынды. Мамыр айы бойы осы мақсатта 354 млрд теңге баламасында шетел валютасы сатылуы мүмкін.

Ұлттық Банк бұл операцияларды жүргізу кезінде нарықтық бейтараптық қағидатын қатаң ұстанатынын және өткен айда ешқандай валюталық интервенция жасалмағанын мәлімдеді.

Сонымен қатар, квазимемлекеттік сектор субъектілерінің валюталық түсімнің бір бөлігін міндетті түрде сату нормасы да нарыққа өз әсерін тигізді. Бұл бағыт бойынша сәуірде сатылған валюта көлемі шамамен 273 млн АҚШ долларын құрады.

Зейнетақы жарналарының үздіксіз түсуі және теңге бағамының нығаюы нәтижесінде Бірыңғай жинақтаушы зейнетақы қоры (БЖЗҚ) активтеріндегі валюталық үлестің 40%-дан төмендегені байқалды. Осыған орай, Ұлттық Банк инвестициялық қоржынды теңгерімдеу мақсатында сәуірде биржа арқылы 502 млн АҚШ долларына шетел валютасын сатып алды.

«Бұл – жалпы сауда-саттық көлемінің шамамен 5,8%-ына тең. Алдағы уақытта да зейнетақы активтерін басқару шешімдері нарықтық жағдайға сай қабылданатын болады», – делінген хабарламада.

Сәуір айында нарыққа 1,1 млрд долларға тең валюта шығарылып, теңге бағамы бір айда 4%-ға нығайған.