Тұрғын үй нарығы: Алматы мен Астанада баспана бағасы қымбаттады
2026 жылғы сәуірде тұрғын үй нарығындағы баға динамикасында айтарлықтай парадокс пен өңірлердегі баға алшақтығы байқалып отыр. KursivMedia-ның ресми статистика мен нарық конъюнктурасына жасаған талдауы баға сұранысқа ғана емес, аймақтардың экономикалық ерекшелігіне тікелей байлаулы екенін аңғартты.
Қайталама нарық парадоксы
Елдегі орташа статистикаға көз жүгіртсек, бір қызық құбылысты байқаймыз. Қазақстан бойынша қайталама нарықтағы орташа баға (630 009 тг) жаңа тұрғын үйлердің бағасынан (615 933 тг) жоғары.
Бұл әсіресе Алматы қаласында анық көрінеді, мұнда ескі пәтерлердің шаршы метрі жаңа ғимараттардан орта есеппен 13 мың теңгеге қымбат (746 мыңға қарсы 733 мың).
Себебі неде? Инфляция мен құрылыс материалдарының қымбаттауын ескеретін сатып алушылар қара сылақпен берілетін жаңа үйлерге қосымша қаражат құйғаннан гөрі, дайын немесе қаланың орталығында орналасқан пәтерді көбірек таңдап отыр.
Екі мегаполис бәсекесі: Алматы Астанадан озды
Дәстүрлі түрде елорда мен оңтүстік астана арасындағы баға бәсекесінде Алматы тағы да абсолютті көшбасшы атанды.
- Алматы: Жаңа үйлер – 733 375 тг, Жалға алу – 5 824 тг.
- Астана: Жаңа үйлер – 731 990 тг, Жалға алу – 5 529 тг.
Екі қаладағы баға елдегі ең арзан аймақтардан (Орал, Ақтөбе, Көкшетау) екі еседей қымбат.
Мегаполистердегі демографиялық өсім мен ішкі миграция тұрғын үй тапшылығын қолдан жасап, бағаны жоғары деңгейде ұстап тұр.
Өнеркәсіптік өңірлердің «қызуы»
Тек Астана мен Алматы ғана емес, өнеркәсібі дамыған батыс пен шығыс аймақтар да тұрғын үй бағасы жоғары.
Мәселен, мұнайлы Атырауда жаңа үйлердің шаршы метрі 537 мың теңгені құраса, металлургия орталығы Өскеменде көрсеткіш 530 мың теңгеге жеткен.
Бұл өңірлердегі халықтың төлем қабілеті мен өндірістік сектордағы жоғары жалақы мөлшері жылжымайтын мүлік нарығын тікелей «қыздырып» тұр.
Бұған дейін 2026 жылы ипотеканы қай банктен рәсімдеген тиімді деген сұраққа жауап іздегенбіз.
