Таяу Шығыстағы шиеленіс: Әлемдік компаниялардың шығыны 25 млрд долларға жетті
Reuters агенттігінің мәліметінше, АҚШ пен Израильдің Иранмен қақтығысы әлемдік компанияларға кем дегенде 25 млрд доллар шығын әкелген әрі көрсеткіш тоқтаусыз өсіп жатыр.
Дағдарыстың негізгі себептері
Иранның Ормұз бұғазын жауып тастауы мұнай бағасын барреліне 100 доллардан асырды. Бұл тасымалдау құнын қымбаттатып, тыңайтқыш, алюминий және басқа да шикізат түрлерін жеткізуді қиындатты. Осыған байланысты Whirlpool, P&G, Toyota сияқты 280-ге жуық ірі компания шығынды жабу үшін тауар бағасын өсіруге, өндірісті қысқартуға немесе қызметкерлерін ақысыз демалысқа жіберуге мәжбүр.
Таяу Шығыстағы қақтығыстан әуе компаниялары, химия және тұтыну тауарлары саласы ең көп зардап шекті
Reuters-тің 279 компанияның есептеріне жасаған талдауына сәйкес, кәсіпорындар бағаны өсіріп, болжамдарын төмендетуге және шығындарды қысқартуға мәжбүр
Ең көп зардап шеккен салалар
Авиациялық отынның екі есе дерлік қымбаттауынан әуе компаниялары ең үлкен соққы алып, олардың шығыны шамамен 15 млрд долларды құрады. Жалпы алғанда, Таяу Шығыс энергия ресурстарына қатты тәуелді болғандықтан, Еуропа мен Азия елдеріндегі компаниялар дағдарыстан көбірек зардап шегуде.
Бірінші тоқсанда ірі компаниялардың табыс көрсеткіштері жақсы болып көрінгенімен, сарапшылар нақты қаржылық соққы екінші тоқсаннан бастап анық сезіледі деп ескертеді. Тауарлардың ұзақ уақыт бойы қымбаттауы инфляцияны күшейтіп, қарапайым тұтынушылардың сатып алу қабілетін айтарлықтай құлдыратады.
Айта кетейік, Bloomberg мәліметінше АҚШ пен Иран апталарға созылған соғысты тоқтату және стратегиялық маңызы бар Ормұз бұғазын қайта ашу туралы келісімге келуден әлі де өте алыс.
