Қазақстанның сыртқы сауда айналымы 32,9 млрд долларға дейін артты
2026 жылдың бірінші тоқсанының қорытындысы бойынша Қазақстан сыртқы сауда айналымын 32,9 млрд долларға дейін арттырды. Көрсеткіш өткен жылдың сәйкес кезеңімен салыстырғанда (29,8 млрд доллар) 10,5%-ға жоғары. Мұндай мәліметтерді ҚР Сауда және интеграция министрлігі ұсынды.
2026 жылдың қаңтар-наурыз айларындағы экспорттың жалпы көлемі 9,4%-ға өсіп, 18 млрд долларды құрады. Ал есепті кезеңдегі Қазақстан импорты 2025 жылдың бірінші тоқсанымен салыстырғанда 11,8%-ға ұлғайып, 14,9 млрд долларға жетті.
«Айтарлықтай өсім электр генераторлық қондырғыларға тиесілі. Олардың импорты 5 еседен астам артып, 416,8 млн долларға жетті. Сондай-ақ газ турбиналары мен авиациялық қозғалтқыштарды, мұнай өнімдерін, теміржол локомотивтерін, сонымен қатар шикізатты өңдеу мен сұрыптауға арналған жабдықтарды әкелу де айтарлықтай өсті», – деп түсіндірді Сауда министрлігі.
Шикізаттық емес тауарлар саудасы
2026 жылдың қаңтар-наурыз айларында Қазақстанның шикізаттық емес тауарлар бойынша сыртқы сауда айналымы 20,4 млрд долларға жетіп, өткен жылғы деңгейден 13,5%-ға асып түсті. Бұл ретте шикізаттық емес экспорт бірден 23,4%-ға өсіп, 6,9 млрд долларды құрады.
Шикізаттық емес экспорттың негізгі қозғаушы күштеріне мыс және мыс катодтары, күміс, уран, ферроқорытпалар, мал азығы өнімдері, күнбағыс майы жатады.
Негізгі сауда серіктестері
Бірінші тоқсанның қорытындысы бойынша елдің ең ірі сауда серіктесі – Қытай. Онымен арадағы тауар айналымы 7,8 млрд долларды құрап, Қазақстанның жалпы сыртқы сауда көлемінің 23,8%-ын иеленді.
Ресей 6,5 млрд доллар сауда көлемімен екінші орынды сақтап қалды. Сонымен қатар ірі серіктестер қатарына Италия, Түркия және Өзбекстан кірді.
«Қазақстанның Еуропа бағытындағы экспорттық позициясының нығаюын ерекше атап өткен жөн. Италиямен тауар айналымы 3,4 млрд доллардан асты, сонымен қатар қазақстандық экспорттың көлемі 3 млрд доллардан астам соманы құрады», – деп қорытындылады министрлік.
Айта кетейік, бұған дейін 2026 жылдың бірінші тоқсанында импорт көлемі 15 млрд долларға жуықтағанын жазған едік.
