2026 жылдың ең табысты атлеттері анықталды

Спорт әлеміндегі инвесторлардың көбеюі мен лигалардың рекордтық табыстарының арқасында әлемнің бас спорт жұлдыздары соңғы жылдары табысын тек еселеп келді. Соңғы 8 жылда (2020 жылғы пандемия кезін қоспағанда) Топ-50 спортшының жалпы кірісі өсумен болды. Жылдық табыс 2018 жылы 2,6 млрд доллар болса, 2025 жылы 4,2 млрд долларға дейін жеткен.

Биылғы көрсеткіштер: Табыс қайдан түсіп жатыр?

Алайда биыл үздіксіз өсім сәл бәсеңдеді. Топ-50 спортшы соңғы 12 айда (салықтар мен агенттік төлемдерді шегермегенде) 4,1 млрд доллар табыс тапқан. Жалпы соманың 3%-ға төмендеуіне америкалық футболдағы (NFL) ірі келісімшарттардың былтырғымен салыстырғанда азаюы себеп болды. Дегенмен, бұл Forbes тарихында тіркелген екінші ең жоғары көрсеткіш болып қала береді.

Табыс қайдан?

• 3 млрд доллар – тікелей спорт алаңындағы табыс (жалақы, бонустар және жүлде қоры).
• 1,1 млрд доллар – спорттан тыс кіріс (жарнамалық келісімшарттар, бренд елшісі болу және жеке бизнес).

Көшбасшы мен рейтингтің төменгі шегі

Тізімді қатарынан төртінші жыл футбол жұлдызы Криштиану Роналду бастап тұр. Оның табысы 300 млн долларды құрап, Forbes тіркеген тарихи рекордты қайталады.

Рейтингті үздік теннисші Янник Синнер 54,6 млн доллар табыспен қорытындылады. Бұл Топ-50 қатарына кіру үшін қажет болған тарихтағы ең жоғары «төменгі шек» (өткен жылы ол 53,6 млн доллар болған).

Баскетбол үстемдігі

Биылғы тізімге 18 елдің және 8 түрлі спорттың өкілдері кірді. Соның ішінде ең көп үлес баскетболшыларға тиесілі. NBA-дегі жалақы шегінің тұрақты өсуінің арқасында биыл Топ-50 тізіміне 20 баскетболшы кірді (бұл былтырғыдан 4 ойыншыға көп). Ал 2027 жылға қарай тізімге тағы бірнеше баскетболшы қосылып, жаңа қаржылық секіріс басталуы әбден мүмкін.

Айта кетейік, бұған дейін Өзбекстан футболдан Әлем чемпионатына қатысатын құрамын жариялаған.