«Әділет» партиясы ресми түрде тіркелді

Қазақстанда жаңа саяси ұйым пайда болды. 1 маусымда «Әділет» партиясы ресми түрде тіркеуден өтті. Бұл туралы саяси бірлестіктің төрағасы Айбек Дәдебай мәлімдеді.

Жаңадан құрылған партия билік саясатын қолдайды. Ұйым басшысы жаңадан құрылған бірлестік елдің саяси жүйесінде бәсекені күшейтті деп есептейді.

«Бүгін «Әділет» партиясы мемлекеттік тіркеуден өтті. Бұл – еліміздің дамуындағы жаңа кезеңнің басталуы. Мемлекет басшысы Қасым-Жомарт Тоқаевтың бастамасымен жүзеге асырылған саяси реформалардың нәтижесінде еліміздің саяси жүйесі ашық әрі бәсекеге қабілетті бола түсті», – деп мәлімдеді Дәдебай.

Саясаткер партияның тіркелгенін «оң өзгерістердің нақты көрінісі» деп сипаттады.

«Партия қатарында еңбек адамдары, қоғам қайраткерлері, ғалымдар, кәсіпкерлер мен жалынды жастар қосылды», – дейді ұйым басшысы.

Ол саяси бірлестікке қосылған азаматтарға алғыс айтты.

Бастамашыл топ «Әділет» партиясы құрылатынын биыл сәуірдің ортасында мәлімдеген. Саяси ұйым Әділетті Қазақстан құндылықтарын қорғауды көздейді. Ал мамырдың басында бірлестіктің құрылтай съезі өткен. Енді ол тамыз айында Құрылтай сайлауына түседі.