Шығыстық азамат Қазақстанның төрт өңірін байланыссыз қалдырды

Шығыс Қазақстан, Абай, Павлодар облыстары мен Жетісудағы мыңдаған абонент кабельдің қатты зақымдануына байланысты уақытша байланыссыз және интернетсіз қалды.

«Қазақтелеком» АҚ хабарлағандай, оқиға 8 маусым күні сағат 16:59-да Өскемен-Шемонаиха учаскесінде болған. Алдын ала мәліметтер бойынша, кінәлі азамат – келісімсіз жер қазу жұмыстарын жүргізіп, байланыс желісін зақымдаған ШҚО тұрғыны.

«Апат еліміздің төрт өңіріндегі – ШҚО, Абай, Павлодар және Жетісу облыстарындағы интернет сервистері мен мобильді байланыс сапасына әсер етті. Магистральдің зақымдануы ірі операторлардың жұмысында ауқымды іркілістерді тудырды. Семей, Павлодар және Өскемен қалаларында интернет жылдамдығының төмендегені тіркелді», – деп хабарлады компанияның баспасөз қызметі.

Сондай-ақ, Үржар, Глубокое, Аягөз, Бородулиха аудандары, Мақаншы ауданы, Риддер қаласы, сонымен қатар GPON желісінің абоненттері кең жолақты интернет пен қалалық телефон байланысынсыз қалғаны атап өтілді.

Жалпы алғанда, іркілістер 25 мыңнан астам қолданушыға әсер етті. Сондай-ақ, тіркелген телефон желісінде де жаппай іркілістер тіркелді.

Оқиға орнында апаттық қызметтер жұмыс істеуде, желіні қалпына келтіру жүргізілуде. Байланыс пен интернетті таяу уақытта штаттық режимге қайтаруға уәде берілді.

Айта кетейік, бұған дейін өзін «№1 мобильді интернет» деп жарнамалаған операторға сот жеке ұйғарым шығарғанын хабарлаған едік.