AI Hub құрылып, мемлекеттік қызметтер жасанды интеллектіге көшіріледі
Үкімет 2029 жылға дейінгі «Digital Qazaqstan» ауқымды цифрландыру және жасанды интеллект технологияларын енгізудің жалпыұлттық стратегиясын бекітті.
Құжатқа сәйкес, Қазақстан алдағы үш жылда цифрландыру мен жасанды интеллекті мемлекеттік басқару, экономика және әлеуметтік салаға кеңінен енгізбекші. Осының арқасында 2029 жылға қарай елдің ЖІӨ өсіміне жыл сайын қосымша 1,5 пайыздық тармақ қосып, 10,5–16,5 млрд доллар көлемінде инвестиция тартуды жоспарлап отыр.
Стратегия үш негізгі бағыттан тұрады:
- азаматтарға арналған цифрлық қызметтерді дамыту,
- экономиканың нақты секторын цифрландыру
- мемлекеттік басқаруды жаңғырту.
Экономика саласында агроөнеркәсіп, құрылыс, қаржы, мұнай-газ және шағын бизнес секторларын терең цифрландыру жоспарланған. Билік жасанды интеллект, цифрлық егіздер мен интеллектуалды платформаларды енгізу еңбек өнімділігін арттырып, бизнес шығындарын азайтады деп есептейді.
Стратегия аясында елде озық есептеу қуаттарын, ғылыми ұйымдар мен технологиялық компанияларды біріктіретін егеменді «AI Hub» құру жоспарланған. Оның құрамындағы деректерді өңдеу орталықтарының қуаты 1 ГВт-қа дейін жетуі мүмкін.
Мемлекеттік басқаруда шешім қабылдау процестері үлкен деректерге негізделген жүйеге көшіріліп, әкімшілік рәсімдердің бір бөлігі автоматтандырылады. Сонымен қатар киберқауіпсіздік пен ұлттық ақпараттық кеңістікті қорғауға ерекше назар аударылады.
Үкімет жоспарына сәйкес, 2029 жылға қарай Қазақстан халықаралық цифрлық бәсекеге қабілеттілік рейтингтеріндегі позициясын жақсартып, технологиялық тұрғыдан дамыған мемлекеттердің қатарына қосылуды көздейді.
Бұған дейін ЖИ министрлігі мемлекеттік басқаруға жасанды интеллект енгізіліп жатқанын хабарлаған. Ол үшін арнайы ұлттық платформа әзірлемекші.
