Көрші елде отын тапшы: Ресей Қазақстаннан жанар-жағармай сұрады ма
Ресей тарапы Қазақстанға бензин мен дизель отынын жеткізуді бастау туралы ресми түрде өтініш жасамаған. Бұл туралы Сенат отырысының кулуарында Энергетика министрі Ерлан Ақкенженов мәлімдеді.
«Ресей отын жеткізу бойынша Қазақстаннан әлі ештеңе сұраған жоқ. Бізге ешқандай ресми сауал түскен жоқ», — деді министр журналистердің сұрақтарына жауап бере отырып.
Сонымен қатар министр техникалық мүмкіндік туындаған бойда, Ресей аумағы арқылы өтетін «Дружба» құбырымен Германияның Шведт қаласындағы мұнай өңдеу зауытына (МӨЗ) Қазақстан мұнайының транзиті қайта басталуы мүмкін екенін жоққа шығармады. Айта кетейік, бұл бағыттағы транзит мамыр айында Ресей тарапының бастамасымен тоқтатылған болатын.
Отын тапшылығы және импорт мәселесі
Бұған дейін Reuters агенттігі салалық дереккөздерге сілтеме жасап, Ресейдің маусым айында бензинді теңіз жолымен импорттауды жоспарлап отырғанын хабарлады. Бұл қадам РФ мұнай өңдеу зауыттарына жасалған ұшқышсыз ұшу аппараттары шабуылдарынан кейін ішкі нарықта туындаған отын тапшылығын еңсеру үшін жасалып отыр.
Маусым айында жанармай партиясы Ресейдің батыс порттарының бірі арқылы жеткізілмек. Бұл – мұнай мен мұнай өнімдерін әлемдегі ең ірі экспорттаушылардың бірі саналатын мемлекет үшін сирек кездесетін жағдай. Агенттік дереккөздерінің бірі бензиннің Азиядан жеткізілетінін айтқанымен, оның нақты көлемі мен жеткізуші компанияны атамады.
Ақпаратқа сәйкес, Мәскеу тапшылықтың орнын толтыру үшін көршілес Беларусьтен отын импорттап жатыр. Сондай-ақ бұған дейін Қазақстаннан да аз көлемде отын сұраған. Алайда дереккөздердің пайымдауынша, отын дағдарысы ушыға түскен жағдайда, бұл екі елдің ешқайсысында Ресейге айтарлықтай қолдау көрсететіндей жеткілікті қор жоқ.
Дрон шабуылы басылмай тұр
Сонымен қатар Ресейдің отын инфрақұрылымы нысандарына дрондардың шабуылы жиіледі. Маусым айында «ТАНЕКО» мұнай өңдеу кешені (бұл кәсіпорын қазақстандық «Конденсат» МӨЗ-і үшін шикізат жеткізеді) мен аймақтықты отынмен қамтамасыз етуде басты рөл атқаратын Мәскеу МӨЗ-іне соққы жасалды.
Осыған байланысты қос кәсіпорын да мұнай өңдеуді уақытша тоқтатуға мәжбүр болған.
