Габон мен Вьетнамға барып келген екі алматылықтан безгек анықталды
Соңғы аптада Алматыда сырттан жұққан безгек ауруының бірден екі жағдайы тіркелді. Инфекция Габонға іссапармен және Вьетнамға саяхаттап барып, қалаға оралған тұрғындардан анықталды.
Ұлттық қоғамдық денсаулық сақтау орталығының мәліметінше, жыл басынан бері мегаполисте бұл қауіпті аурудың сырттан жұққан төрт жағдайы тіркеліп үлгерген.
«Пациенттерден безгектің екі түрлі формасы – тропиктік және үш күндік түрлері диагностикаланды. Тропиктік безгек ең қауіпті болып саналады: уақытылы емделмесе, ол ми, бауыр, бүйрек және тыныс алу жүйесінің зақымдануын қоса алғанда, ауыр асқынуларға, ал кейбір жағдайларда өлімге әкеп соғуы мүмкін», – деп атап өтті Ұлттық қоғамдық денсаулық сақтау орталығы.
Үш күндік безгек әдетте жеңілірек өтеді, бірақ оның өз ерекшелігі бар: қоздырғыш организмде ұзақ уақыт бойы сақталуы мүмкін, сондықтан ауру жұқтырғаннан кейін бірнеше ай өтсе де қайтадан бас көтеруі ықтимал.
«Жағдайлар зертханалық тұрғыдан расталды, пациенттер стационарда ем қабылдап жатыр. Мамандар қажетті эпидемияға қарсы іс-шаралар кешенін жүргізуде», – деп нақтылады орталықта.
Мамандар инфекцияның тұрғындар арасында әрі қарай таралу қаупі жоқ екеніне сендірді, себебі тіркелген жағдайлар сырттан жұғып келген. Безгектің берілуі үшін инфекция жұққан безгек масасының шағуы қажет.
Безгек Anopheles тұқымдас инфекция жұққан масалардың шағуы арқылы беріледі. Сонымен қатар, тұрмыста ауру адамнан жұқтыру мүмкін емес: инфекция қол алысу, ыдыс-аяқ, тамақ, су немесе ауа-тамшы жолымен берілмейді.
Айта кетейік, осыған дейін Конгодағы Эболаның жаңа өршуі кезінде 65 адам қайтыс болғанын жазған едік.
